iklan

EKONOMIA, BOBONARO, HEADLINE, INKLUZAUN SOSIÁL, MUNISÍPIU

Sistema gravitasaun Bere-Mau sei funsiona iha semana oin

Sistema gravitasaun Bere-Mau sei funsiona iha semana oin

Diretor Bee Timor-Leste, Empreza Públika (BTL,EP) Munisípiu Bobonaro, Adriano da Cruz. Imajen Tatoli/Sérgio da Cruz.

BOBONARO, 12 setembru 2022 (TATOLI)-Diretór Bee Timor-Leste (BTL,E.P), Adriano da Cruz, hateten sistema gravitasaun Bere-Mau ne’ebé lokaliza iha aldeia Pipgalak I, suku Tapo-Memu, postu administrativu Maliana sei funsiona hikas iha semana oin hodi fornese bee-moos ba komunidade aldeia tolu iha suku Holsa.

Notísia relevante: BTL,EP Bobonaro sei mellora sistema bee-moos ho kualidade

“Bee Bere-Mau bele kontinua ona ba Muduglau, hahú funsiona ona distribuisaun bee aldeia Oplegul, Bilicou, Lolo’a no aldeia Taz. Ohin, ha’u orienta ona sira iha Pipgalak kontrola ona tún mai, envolve traballadór harian lepas,” nia informa ba Jornalista sira, iha Maliana, kinta ne’e.

Adriano subliña, atu asegura funsionamentu sistema gravitasaun bee-moos ne’e BTL selu ona traballadór na’in-rua kontrola komunidade sira ne’e-ne’ebé hasai bee ilagál ba natar no to’os sein koñesimentu hosi operadór sira.

BTL esforsu normaliza fali sistema ne’e tamba tinan kotuk sistema ne’e hetan estragu kauza hosi dezastre naturál rezulta rai halai lori hotu liña distribuisaun sira.

“Ami ba oin sei hadi’a mós sira-nia sistema, sira sa’e ba ne’e komesa hosi Pipgalak tún mai to’o Lepgen ho fatuk-metan BTL sei garante bee ba sira, maibé neneik sira mós sei selu,” nia dehan.

Responsavél BTL munisípiu ne’e hatutan, daudaun ne’e mudansa klimátika fó impaktu ba bee-matan ezistente sira hanesan Ai-Khumu, Atugalai, Galisapulu no Lugu-Luli no Bere-Mau menus hosi litru tolu pur segundu to’o litru ida-resin.

Nune’e obrigatóriu fornesimentu bee ba konsumidór sira iha kapitál Maliana normalmente loron rua dala-ida, tanba utiliza de’itt estasaun bomba ne’ebé rekursu bee mai hosi mota Bulobu matan, pertense mós ba irrigasaun Maliana I hodi sai fonte alternativa atu apoia bee ba tanke rezervatóriu 11.

“Agora bomba ne’e ita la’ós ba rezervatóriu 11, ita sei fornese hosi Lesu-Phun, Santa-Cruz no ba Pemancar deit, agora tanki iha Lesu-Bote ne’e ita la Bomba sa’e, tanba kapasidade bomba ne’e limitadu, nune’e mós atu bomba ba tanki Raifun no Ritabou susar oituan,” nia informa.

Diretór ne’e sublima, tanki rezervatóriu tolu ne’ebé agora apoia bee, ida pemancar ninia área kobertura mak Dom-Bosco, ospitál tuan, Rokon no Bekora, tanki  rua iha Santa-Cruz nia distribuisaun kobre suku Holsa no Ritabou.

Nune’e mós parte balun, liuliu iha área eis Kodim besik kampu aviasaun, enkuantu tanki Lesu-Phun fornese de’it ba suku Raifun.

“Bee sei sufisiente hela maske bailoron, maibé bee Lugulilui ne’e mós sei to’o hela ba komunidade sira, depois operadór sira opera tuir oras, tanba bee ne’e mós ita kanaliza ba rezidénsia Amu Bispu nia hela-fatin,” nia informa.

Atu mellora fornesimentu bee-moos hodi apoia bee ba bee matan ezistente lima ne’e BTL,E.P mós daudaun ne’e konstrui ona sistema tratamientu bee ka water treatment pump iha aldeia Lesupun, suku Lahomea, ne’ebé responsabliza hosi empreza Lavida Unipesoál Lda, ho totál orsamentu rihun $530.

Bomba refere kapta direita bee hosi mota Bulobu ulun ho volume litru 25 pur segundu hodi apoia dsitribuisaun ba tanki rezervatóriu iha Santa Cruz no pemancar suku Lahomea, hafoin distribui ba konsumidór sira iha kapitál Maliana.

sistema ne’e mós sei halo separasaun ho operadór liña transmisaun hosi irrigasaun Maliana I, atu evita bainhira mota tún garante nafatin fornesimentu bee-moos ba kliente sira funsiona normál.

Tuir dadus estatístika 2020 postu administrativu Maliana iha aldeia 39, suku hitu mak hanesan, Lahomea, Raifun, Ritabou, Holsa, Odomau, Tapo-Memu no Saburai, ho totál populasaun 36,219, kompostu hosi Mane 19,920, feto 16,299 hosi totál uma-kain 8,360.

Notísia relevante: 2022: BTL, E.P sei implementa konstrusaun fíziku mellora bee-moos

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!