iklan

NASIONÁL, INTERNASIONÁL, HEADLINE, POLÍTIKA

Acelino Manuel Branco nomeadu hanesan xefe misaun apoia resensiamentu eleitorál Guiné-Bissau

Acelino Manuel Branco nomeadu hanesan xefe misaun apoia resensiamentu eleitorál Guiné-Bissau

Diretór Jerál STAE, Acelino Manuel Branco. Imajen Tatoli/Egas Cristóvão

DILI, 16 setembru 2022 (TATOLI)–Governu nomea atuál Diretór Jerál Sekretariadu Tékniku Administrasaun Eleitorál (STAE), Acelino Manuel Branco, nu’udar xefe unidade apoia resensiamentu eleitorál iha Guiné-Bissau tinan ne’e no ninia adjuntu mak Diretór Informatika STAE, Tulia de Andrade.

Diretór Jerál STAE, Acelino Manuel Branco, hateten, apoia resensiamentu eleitorál iha Guiné-Bissau ne’e aprova liuhosi Dekretu Governu númeru 23/2022, 26 agostu hodi kria unidade apoiu ida ne’ebé hosi dekretu-Governu ne’e iha artigu 3 ko’alia katak unidade ne’e sei lidera hosi diretór ida ho adjuntu ida.

“Na’in-rua ne’e hosi direjente STAE nian no propsesu nomeasaun ne’e liuhosi proposta Ministru Administrasaun Estatál, Miguel Perreira de Carvalho, ba Ministra Negósiu Estranjeiru no Kooperasaun, Adalzija Albertina Xavier Reis Magno no iha loron 12 setembru ne’e hasai ona despaisu nomeasaun, nune’e nomea Diretór Jerál STAE no Diretór Informátika STAE, Tulia de Andrade,” Acelino Manuel Branco hateten ba Agência Tatoli, iha ninia knaar fatin, Caicoli, sesta ne’e.

Notísia relevante: Governu aprova kriasaun misaun apoiu prosesu resensiamentu eleitorál Guiné-Bissau

Nomeasaun iha ona daudaun, téknikamente sei halo koordenasaun ho parte Minstériu Negósiu Estranjeiru no Kooperasaun (MNEK) liuhosi ajénsia kooperasaun Timor-Leste ba Guiné-Bissau hodi haree ninia prosesu administrativu sira, nune’e iha tempu badak ekipa bele desloka ona ba Guiné-Bissau tanba iha dekretu-Governu rasik mós define katak planu tomak ba iha misaun ne’e rasik tenke aprezenta ba MNEK, entaun iha loron hirak liubá hato’o ona planu maibé iha ajustamentu buat balun liuliu liga ho planu atividade no planu orsamentu sira inklui planu viajen.

Ekipa ba misaun ne’e sei hela iha Guiné-Bissau tarde liu to’o loron 15 novembru 2022, tanba ne’e ekipa sei arranka iha fulan-setembru ne’e.

“Guiné-Bissau nia eleisaun ne’e hanesan eleisaun antisipada, ne’ebé Prezidente Repúblika sira-nia dekreta tiha ona iha loron 18 dezembru 2022, entaun hela de’it fulan-tolu ho balun entaun presiza ekipa to’o sedu para nune’e bele apoia sidadaun sira iha ne’ebá,” nia adianta.

Tuir planu, ekipa ne’ebé sei serbisu másimu na’in-ualu, tanba serbisu sira ne’e tékniku tebes entaun envolve mós tékniku balun.

“Ita-nia prezensa iha ne’ebá atu reativa hikas sistema servidór ne’ebé sei utiliza hodi asegura baze dadus Guiné-Bissau nian. Ekipa mós sei halo instalasaun ekipamentu resensiamentu nian hosi Timor-Leste nia kontestu iha de’it unidade 60 ekipamentu resensiamentu maibé Guiné-Bissau nian iha unidade 300.

“Jeografikamente ita bele dehan boot liu Timór dala-tolu, entaun iha kontestu Timór prepara ekipamentu sira ne’e kompletu atu uza presiza tempu liu semana rua resin, entaun Guiné-Bissaun nian 300 ne’e presiza tempu barak. Tanba ne’e maka ekipa sei halo serbisu estraordináriu,” nia esplika.

Aleinde ne’e, reativa sistema sei apoia mós instala ekipamentu unidade 300, fó formasaun ba tékniku operadór sira iha ne’ebá, no sei halo mós teste ba sistema sira.

“Ne’e serbisu ida la’ós kama’an, serbisu ida iha risku, entaun presizamente ekipa ida-ne’e bele iha kondisaun hotu ho koordenasaun di’ak para depois bele hala’o kna’ar sira ho konfortável no susesu, nune’e kontribui ba imajen ita-nia rain nian,” nia dehan.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!