VIQUEQUE, 16 setembru 2022 (TATOLI)--Deskonfia membru Polísia Nasionál Timor Leste (PNTL) ida ho inisiál (MM) lori kilat ba kasa komunidade Viqueque nia animál, nune’e komunidade hosi suku Uma-uain Kraik, postu administrativu Viqueque vila, munisípiu Viqueque konsege kaer membru ne’e.
“Kazu membru PNTL ne’ebé tiru komunidade nia animál foin lalais ne’e. Ami entrega ona ba prosesu invetigasaun, maibé Komandu Jerál sei foti medida hasoru membru ho inisiál MM banhira finaliza ona prosesu invertigasaun,” Komandante Administrasaun PNTL, José Maria Neto Mok, hateten iha Komandu PNTL munisípiu Viqueque, sesta ne’e.
Kestaun ne’e bazeia ba keixa hosi komunidade tanba sente sira-nia animál lakon beibeik nune’e sira deskonfia membru PNTL balun maka tiru.
“Hanesan daudaun membru ne’ebé komunidade kaer ne’e, ninia deslokasaun mai Viqueque internalmente Komandu Jerál sei loke prosesu hodi hatene tanba saida maka nia mai Viqueque,” nia akresenta.
Notísia relevante: Atividade kasa ilegál animal fuik kontinua la’o tanba menus rekursu umanu
Tuir Komandante, bainhira membru ruma desloka bá munisípiu tenke iha guia da marsa no se membru bá serbisu tenke iha orden serbisu, ida-ne’e maka regra ne’ebé fó sai hosi Komandu PNTL.
“Karik membru PNTL sira la halo tuir regra, signifika viola regra interna Komandu nian. Nune’e sei submete ba prosesu investigasaun. Ha’u agradese ba komunidade munisípiu Viqueque ne’ebé konsege kaer ona membru ne’ebé deskonfia halo kasa ilegál ba komunidade nia animál. Ha’u enkoraja komunidade, ba oin kuandu hetan membru ruma kasa, imi tenke apreende sira-nia kilat, maibé se lakonsege bele hasai de’it sira-nia fotografia hodi halo relatóriu. Ho ida-ne’e bele kontribui ba seguransa, tanba ita bandu ona ema labele kasa animál fuik, maibé ita kontinua tiru animál fuik sira,” nia hato’o.
Iha fatin ketak, Xefe suku Uma-uain Kraik, Angelo Miguel da S. Soares, hateten, komunidade sira lokál maka kaer no rezolve ona tuir família.
“Durante ne’e komunidade nia animál lakon maibé ami la duun ba membru Polísia sira, maibé ikus mai deskobre. Membru PNTL ho inisiál MM bainhira ba kasa iha área suku Uma-uain Kraik iha loron segunda (12/09) maizumenus tuku 22:00 kalan, hafoin nia fila kasa tuku 02:00 madrugada, nune’e joven sira konsege kaer nia iha área Pola Musan no preende kilat inklui karreta privadu ne’ebé nia utiliza ba kasa,” nia haktuir.
Jornalista : Vitorino Lopes da Costa
Editora : Julia Chatarina
