iklan

HEADLINE, MUNISÍPIU, VIQUEQUE

Estudante  Calixa hetan primeiru lugar ba kompetisaun sertame hosi SEII

Estudante  Calixa hetan primeiru lugar ba kompetisaun sertame hosi SEII

Sekretária Estadu Igualdade no Inkluzaun, Maria do Rósario Fatima Correia, entrega prémiu ba manán-na’in estudante Calixa, sesta (16/09). Imajen Tatoli/Vitorimo Lopes da Costa

VIQUEQUE, 16 setembru 2022 (TATOLI)—Estudante Sekundáriu Calixa sai primeiru lugar ho valór 1.000 ba kompetisaun sertame ne’ebé realiza hosi Sekretaria Estadu Igualdade no Inkluzaun (SEII).

“Ha’u agradese ba SEII ne’ebé loke kompetisaun sertame ida-ne’e ba ami no ami konsege sai vensedór. Ha’u sente orgullu tanba durante ne’e ha’u tuir maibé nunka sai vensedór, ohin ne’e maka sai oportunidade ba ami hodi hetan valór a’as. Ba oin sei prepara di’ak liután hodi partisipa kompetisaun hanesan,” Estudante Calixa, Marito Lucas Ramos, hateten hafoin ramata entrega prémiu ba manán-na’in, sesta ne’e.

Notísia relevante: Selebra loron mundiál feto, SEII realiza sertame iha Covalima

Iha fatin hanesan, Sekretária Estadu Igualdade no Inkluzaun, Maria do Rósario Fatima Correira, enkoraja estudante sira hodi prepara-an.

“Ha’u enkoraja estudante sira hodi prepara-an estuda hodi hasa’e imi-nia koñesimentu no sai estudante matenek. Sertame ida-ne’e hodi fó koñesimentu kona-ba igualdade jéneru,” nia akresenta.

Biban nee, governante apresia vontade estudante sira ne’ebé partisipa maski balun lakon maibé nafatin iha vontade atu apreende.

“Ha’u hato’o parabéns ba estudante sira hotu, labele haree ba montante osan ne’ebé imi manán, maibé valór maka koñesimentu ne’ebé imi hetan,” nia tenik.

Sertame ba nível sekundáriu partisipa hosi eskola haat, ne’ebé primeiru lugar hosi Eskola Calixa ho valór 1.000, segundu lugar Eskola Ensinu Sekundáriu Jerál (ESJ) 04 setembru ho valór 900, terseiru lugar Eskola Sekundáriu Santo Estevão ho valór 775 no kuartu lugar maka Eskola Sekundáriu Kafé Viqueque ho valór 500.

SEII aloka orsamentu ba atividade sertame ne’e hamutuk $400, ne’ebé primeiru lugar hetan $50, segunda lugar $35, terseiru lugar $25, kuartu lugar $10.

Aleinde ne’e, Sekretária Estadu Maria do Rósario entrega prémiu ba manán-na’in sira.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!