iklan

EDUKASAUN, COVALIMA

Selebra loron mundiál feto, SEII realiza sertame iha Covalima

Selebra loron mundiál feto, SEII realiza sertame iha Covalima

Estudante nível ensinu Sekundáriu iha Covalima tuir sertame. Imajen Tatoli/Celestina Teles.

COVALIMA, 08 abril 2022 (TATOLI)—Sekretária Estadu Igualdade no Inkluzaun (SEII) servisu hamutuk ho servisu eduksaun munisípiu Covalima realiza sertame ba estudante nível ensinu sekundáriu iha ámbitu selebra loron mundiál feto ho tema “Igualdade Jéneru ba Mudansa Klimátika” ho tema internasionál “Igualdade Ohin Loron ba Futuru ne’ebè Sustentavél”.

“Tuir loloos loron mundiál feto ne’e ita komemora iha loron 08 fulan-marsu maibé kestaun preparasaun, ohin loron 8 fulan-abril ita foin selebra loron tefere ho kompetisaun sertame,” Pontu vokál SEII, Francisco de Araújo, hato’o liuhosi nia diskursu iha salaun Centro Comunidade Covalima, sesta ne’e.

Loron mundiál feto ne’e, kada tinan SEII hamutuk ho parseiru sira selebra iha postu administrativu no suku sira hodi halo sensibilizasaun informasaun ba komunidade no líder komunitária sira

“Tinan ne’e, SEII servisu hamutuk ho Servisu Eduksaun Covalima hodi selebra loron mundiál feto ba tinan ne’e ita komemora ho atividade sertame ba estudante nível ensinu ensinu Sekundáriu,” nia hateten

SEII realiza sertame ho objetivu atu bele halo sensibilizasaun hodi fó formasaun ba estudante sira liu-liu asuntu jéneru, tanba ko’alia kona-ba jéneru ema barak ko’alia ida-ne’e asuntu feto nian maibé ho atividade ida-ne’e feto mak partisipa no mane labele.

“Ha’u hanoin ida-ne’e la’ós ko’alia kona-ba igualdade jéneru, ema hotu iha direitu no obrigasaun hanesan iha moris família nian iha parte sosiál, kulturál, ekonomiku, no politíka nia laran,” nia dehan.

Atividade sertame ne’e, partisipa hosi estudante sira hosi ensinu Sekundáriu Tékniku Vokasionál Akar Laran, eskola Tékniku Vokasionál Kristal, Eskola Sekundáriu Católika Avé Maria Suai (ESCAM) no Cafe.

Estudante nível ensinu Sekundáriu iha Covalima partisipa iha sertame ne’ebé realiza hosi SEII. Imajen Tatoli/Celestina Teles.

Diretór Servisu Edukasaun Covalima, Rui Suri Seran hato’o agradese ba Sekretária Estadu Igualdade no Inkluzaun (SEII) hodi fó oportunidade ba estudante sira hodi realiza sertame, iha ámbitu selebra loron internasionál feto ne’ebé monu iha loron 8 fulan-marsu tinan ne’e.

“Ami hosi Edukasaun Covalima, hato’o agradese ba SEII hodi fó oportunidade no biban hodi  eleva estudante sira-nia kuñesimentu hodi realiza atividade sertame hodi hatene velosidade  responde,” nia hateten.

Nune’e, nia husu ba estudante sira tenke aproveita oportunidade ne’e ho didi’ak realiza kompetisaun sertame entre estudante sira hosi eskola sira ne’ebé to’o ikus hamosu balun sai manan-na’in no seluk lakon.

“Ita-bo’ot sira aproveita didi’ak oportunidade eventu importante ida-ne’e ba oan sira-nia futuru kompetisaun iha manan no lakon. Ho atividade sertame ne’e atu dezenvolve kapasidade intelektuál hosi estudante sira nível ensinu Sekundáriu sira,” nia dehan.

Sekretáriu Administrasaun Munisípiu Covalima, Francisco de Jesus Alves, reforsa SEII realiza atividade sertame ne’e atu motiva estudante sira hodi halo preparasaun ne’ebè másímu.

“Ohin, ita mai selebra loron mundiál feto, selebra atividade sertame hodi motiva alin estudante sira, entaun imi-nia preparasaun di’ak tebes. Iha sertame ne’e balun iha manan no lakon, maibé bainhira lakon karik tenke kontinua prepara an di’akliu hodi partisipa iha eventu sira seluk,” nia dehan.

Juri ba sertame ne’e mai hosi servisu edukasaun Covalima no hosi SEII rasik no estudante sira ne’ebé mak manan ba primeira lugar sei hetan premiu osan $90 ba segundu lugar sei hetan premeiu osan $75.00 ba treiseiru lugar sei hetan premeiu osan $60 ho sertifikadu.

 Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!