DILI, HEADLINE, POLÍTIKA

PR Horta simu karta kredensiál hosi Embaixadór UE

PR Horta simu karta kredensiál hosi Embaixadór UE

Prezidente Repúblika, José Ramos-Horta, simu karta kredensiál hosi Embaixadór Uniaun Europeia, Mar Fiedrich. iha Palásiu Prezidénsiál Nicolau Lobato, Bairru Pite, sesta (16/09). Imajen Tatoli /Egas Cristovão.

DILI, 16 setembru 2022 (TATOLI)—Prezidente Repúblika (PR), José Ramos Horta, sesta ne’e, simu karta kredensiál hosi Embaixador Uniaun Europeia (UE) foun ba Timor-Leste, Marc Fiedrich.

Notísia Relevante: Mandatu ramata, Embaixadór UE Andrew Jacobs despede ho PM Taur

“Ohin, Prezidente Repúblika simu karta kredensiál hosi Embaixadór Uniaun Europeia nian mai Timor-Leste hodi subtitui fali Embaixadór sesante Andre Jacobs ne’ebé ninia mandatu ramata  ona iha tinan ne’e. No, Embaixadór foun normalmente hala’o nia mandatu durante tinan tolu no depende bainhira sira extende,” Vise Ministru Negósiu Estranjeiru no Kooperasaun (MNEK), Julião da Silva hateten ba jornalista sira hafoin akompaña Embaixadór UE foun aprezenta karta kredensiál ba Xefe Estadu iha Palásiu Prezidensiál Nicolau Lobato, Bairru Pite.

Governante ne’e hateten, hafoin aprezenta karta kredensiál hala’o enkontru bilateral ne’e, Xefe Estadu husu UE atu kontinua apoiu Timor-Leste no husu atu  servisu hamutuk ho setór privadu atu dezenvolve no hasa’e kapasidade setór privadu sira-nian.

“Prezidente husu oinsá mós lori ita-nia setór privadu hodi kompete ba iha merkadu internasionál liu-liu prepara Timor-Leste nia adezaun ASEAN. Prezidente mós husu ba Xefe Misaun foun atu kontinua promove Timor-Leste iha mundu no apoiu adezaun TL ba Organizasaun Mundiál Komérsiu (OMK),” nia hateten.

Biban ne’e, Xefe Estadu kongratula no hato’o bem-vindu ba Embaixadór Uniaun Europeia (UE) foun ba Timor-Leste, Marc Fiedrich,

Tuir nota hosi UE katak,  PR ho Embaixadórr UE hala’o reuniaun bilaterál hodi diskute área kooperasaun hanesan integrasaun rejionál, diversifikasaun ekonómia no nutrisaun, no ko’alia mós situasaun polítika iha Timor-Leste (TL) ne’ebé iha tinan 2023 sei hasoru eleisaun parlamentár.

Ambaixadór UE ba Timor-Leste, Marc Fiedrich, iha kompromisu hodi expande liután relasaun di’ak ne’ebé iha entre UE ho TL.

Timor-Leste no UE partilla valór hanesan no hamutuk hodi defende no promove liberdade fundamental, direitu umanu, demokrásia no multilateralizmu.

Embaixadór sador UE promote katak UE konfiavel kontinua apoiu  dezenvolvimentu Timor-Leste nian.

Jornalista : Nelson de Sousa

Editór   : Cancio Ximenes

iklan
iklan

Leave a Reply

iklan
error: Content is protected !!