VIQUEQUE, 16 setembru 2022 (TATOLI)—Entidade responável finaliza ona reabilitasaun no konstrusaun infraestrutura eskola lima projetu komunitáriu Viqueque no hein inaugura iha novembru tinan ne’e.
“Daudaun ne’e projetu reabilitasaun no konstrusaun eskola lima finaliza ona. Ami hein prosesu inaugurasaun de’it,” Diretór Servisu Edukasaun munisípiu Viqueque, Emídio Amaral, hateten ba Agência Tatoli, iha ninia knaar fatin, sesta ne’e.
Projetu komunitáriu eskola lima ne’ebé finaliza ona mak hanesan Ensinu Báziku Sentrál (EBC, sigla portugés) Cabira-oan, Pre-Eskolár Uaida, Ensinu Báziku Filiál (EBF) Nahae, EBC Uatucarbau no Eskola Pre-Eskolár Maria Lobato.
“Iha munisípiu Viqueque iha eskola hamutuk unidade 18, entaun ami iha eskola unidade 13 mak daudaun ne’e prosesu konstrusaun la’o hela, maibé tama fulan-novembru nian laran sira finaliza konstrusaun ona,” nia akresenta.
Notísia relevante: MEJD lansa projetu komunitáriu konstrusaun sala Eskola ESJ Olocasa Viqueque
Antes ne’e, Ministru Edukasaun Juventude no Desportu (MEJD), Armindo Maia, hateten prosesu konstrusaun komunitáriu la’o tarde tanba ministériu tenke halo koordenasaun ho parte Ajénsia Dezenvolvimentu Nasionál (ADN).
“Durante ne’e, konstrusaun paradu kuaze fulan-tolu tanba ita tenke aserta ho ADN tanba bazeia ba lei, ADN presiza halo verifikasaun no fiskalizasaun hodi hetan aprovasaun. Ho ida-ne’e maka trava konstrusaun, maibé ita hadi’a ona manuál kona-ba konstrusaun projetu komunitáriu, nune’e agora hahú halo pagamentu ba faze daruak nian tanba ita hakarak tama fulan-novembru bele atinje ona 70% no prontu ona hodi ita halo inaugurasaun,” nia hato’o.
Alokasaun orsamentu ba programa projetu komunitáriu iha Viqueque hamutuk $1.781.991,95, kompostu hosi postu administrativu Viqueque villa ba Ensinu Sekundáriu Calixa iha sala tolu ho orsamentu $113.359,56, EBF Ular Rihik iha sala tolu ho orsamentu $70.533,26, Eskola Pre-Eskolár Maria Lobato iha sala rua ho orsamentu $99.495,02, EBC Cabira-oan iha sala haat ho orsamentu $52.836,14 no Eskola Pre-Eskolár Sebastião Gomes iha sala rua, enkuantu iha suku Uaimori seidauk implementa projetu ho orsamentu $89.396,09.
Postu admistrativu Ossu ba Eskola Pre-Eskolár Uaibua iha sala tolu ho orsamentu $86.739,52, ESJ Olocasa iha sala tolu ho orsamentu $112.885,23, postu Ossu iha eskola rua seidauk implementa projetu hanesan Eskola EBF Uaibobo iha sala tolu ho orsamentu $116.976,18 no Eskola EBF Liaruca iha sala tolu ho orsamentu $112.599
Postu administrativu Uatulari ba Eskola EBF Nahae iha sala tolu ho orsamentu hamutuk $114.134,85, EBC Uatulari ba sala tolu ho orsamentu $70.191,21, EBF Ualeque iha sala tolu ho orsamentu $106.475,42, Eskola Sekundáriu Tékniku Vokasionál (ESTV) Kaloheda ho orsamentu $159.590,65, EBF Debuisi iha sala tolu ho orsamentu $98.990,27, EBF Uaibira iha sala tolu ho orsamentu $103.111,97 no EBF Edimumo iha sala tolu ho orsamentu $98.958,49 no iha postu administrativu Uatucarbau, projetu konstrusaun Eskola ESJ Uatucarbau iha sala haat ho orsamentu $90.595,35 no EBC Uatucarbau iha sala haat ho orsamentu $85.016,63.
Jornalista : Vitorino Lopes da Costa
Editora : Julia Chatarina
