iklan

NASIONÁL, DEFEZA, HEADLINE

Tenente Jenerál Falur reafirma operasaun konjunta kontinua depende situasaun

Tenente Jenerál Falur reafirma operasaun konjunta kontinua depende situasaun

Xefe Estadu-Maiór Jenerál F-FDTL, Tenente Jenerál Falur Rate Laek Falur Rate Laek. Imajen Tatoli /Egas Cristóvão

DILI, 16 setembru 2022 (TATOLI)–Xefe Estadu-Maiór Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek, reafirma, operasaun konjunta entre Polísia Nasionál Timor-Leste (PNTL) no F-FDTL ramata ona maibé bele kontinua depende ba situasaun.

“Operasaun konjunta hotu tiha ona, agora hein atu halo relatóriu no avaliasaun. Kontinua depende ba situasaun, kuandu ameasadu bele kontinua maibé situasaun normál para ona, ne’ebé situasaun agora kalma hela,” Tenente Jenerál Falur Rate Lae, hateten hafoin reuniaun semanál ho Prezidente Repúblika, iha Palásiu Prezidensiál, Bairru-Pité, sesta ne’e.

Notísia relevante: PNTL: operasaun konjunta konsege halo Dili hakmatek

Responsável másima defeza ne’e dehan, maski operasaun konjunta ramata ona maibé atividade seguransa kontinua la’o tanba ne’e papél Polísia nian.

“Polisia nia vida tomak halo seguransa, ami forsa fó apoiu maibé ami-nia seguransa Polísia Militár kontinua patrulla hodi kontrola militár sira para labele la’o tun-sa’e, ba mete tun-sa’e arte-marsiál, ema tuda malu labele tama fali iha laran para ema tuda ka baku fali sira,” nia akresenta.

Biban ne’e, Xefe Estadu Maiór F-FDTL apela ba membru sira atu labele mete organizasaun sira hodi halo problema fali ho ema sivil.

“Polísia Militár mantein operasionál no kontrola forsa sira para labele indisiplina, labele ba halo problema ho populasaun, labele halo problema ho jornalista sira,” nia fó hanoin.

Falur mós kontinua husu atu públiku, liuliu joven sira atu respeita malu, liuliu respeita militár, atu evita problema ne’e papél hotu-hotu nian, maibé ne’e depende ba idaidak nia konsiénsia.

“Forsa mós labele ba baku arbiru ema sivil no ema sivil mós labele baku ema arbiru,” nia adianta.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!