BOBONARO, 19 setembru 2022 (TATOLI)-Diretór Servisu Edukasaun munisípiu Bobonaro, Crispim Moniz, hateten dadus provizóriu estudante hamutuk na’in 4.322 iha munisípiu Bobonaro sei partisipa ezame nasionál tinan letivu 2022 ne’ebé tuir kalendariu sei realiza iha fulan-outubru ne’e.
Notísia Relevante: Edukasaun Bobonaro destaka funsionáriu 30 monitoriza ezame trimestre daruak
“Ita iha sentru ensinu báziku hamutuk 30 ho nia alunu hamutuk 2.578, depois Ensinu Sekundáriu Jerál ita iha sentru realizadora ezame nasionál hitu no nia totál alunu hamutuk 1.261, depois Eskola Tekniku Vokasionál ita iha eskola ualu ho totál alunu 4.93,” nia informa ba Jornalista sira, iha Maliana, segunda ne’e.
Nia dehan, ohin halo enkontru internál ho xefe departamentu sira no funsionáriu eskritóriu servisu edukasaun munisípiu Bobonaro, oinsá atu halo jestaun ba andamentu ezame ne’e la’o ho susesu.
Responsável Edukasaun Bobonaro ne’e akresenta, semana oin sei realiza mós enkontru preparasaun ho dirijente eskola sira nune’e orienta treina estudante sira oinsá bele koñese utiliza sistema korresaun komputadór iha ámbitu ezame nasionál.
Nia apela ba estudante finalista sira hotu atu mantein kontaktu ho livru ne’e, manorin sira fó durante prosesu aprendizajen nune’e bele hasoru ezame períodu ne’e ho resultadu ne’ebé di’ak.
Tanba ezame tinan ida ne’e Ministériu Edukasaun, Juventude no Desportu (MEJD), fó bolsa méritu ne’ebé mak sei atribui prémiu ba estudante hetan prestasaun di’ak ho valór mellór klasifikadu.
“Edukasaun mak xave prinsipál hosi muda ita-nia vida, muda ita moris uluk ladún di’ak iha tempu oin sai di’ak liután, bele muda mós ita-nia hanoin sai kreativa liu,” nia dehan.
Atu hasoru ezame finál tinan ne’e, munisípiu Bobonaro hetan distribuisaun karteira eskola hosi MEJD) serka 1.400 kobre hotu eskola sira iha postu administrativu neen ne’ebé durante ne’e presiza.
Notísia relevante: Diretór serbisu edukasaun Bobonaro enkoraja profesór-sira simu vasina
Jornalista: Sérgio da Cruz
Editór: Evaristo Soares Martins
