DILI, 19 setembru 2022 (TATOLI)—Fundasaun Hanai Malu (FHM) rejista ona kooperativa hamutuk 57 sai membru no membru pesoál hamutuk 15.679, desde ezisténsia hosi tinan 2010 to’o 2022.
“Kooperativa hamutuk 57 kompostu hosi kooperativa kréditu 53 no kooperativa non kréditu hamutuk haat ho atividade hanesan fa’an sasán, hakiak animál no seluk tan,” Prezidente FHM, João Manuel Belo, informa ba Agência Tatoli iha ninia knaar fatin, Bairru-Pité, segunda ne’e.
Notísia relevante: Kooperativa Kréditu Tane Malu Viqueque hahú prodús mina-sona
Aleinde ne’e, FHM ne’e reativa hosi membru pesoál hamutuk 15.679 ho kapitál hamutuk $11.362.283,74, ne’ebé halibur hahú tinan 2010 to’o 30 juñu 2022.
Dirijente ne’e dehan, dezafiu ne’ebé fundasaun enfrenta nu’udar movimentu kooperativizmu mak sosiedade barak mak seidauk hatene saida mak kooperativa.
“Solusaun mak ami kontinua halo sosializasaun ba sosiedade atu hatene benefísiu, vantajen no dezvantajen, nune’e komunidade bele envolve-an iha kooperativa ne’ebé iha,” nia tenik.
Jornalista : Arminda Fonseca
Editora : Julia Chatarina
