iklan

EDUKASAUN, HEADLINE

PM Taur sei halo lansamentu konstrusaun IPB iha 26 setembru

PM Taur sei halo lansamentu konstrusaun IPB iha 26 setembru

Ministru Ensinu Superiór Siénsia no Kultura, Longuinhos dos Santos. Imajen Tatoli/Francisco Sony

DILI, 19 setembru 2022 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, informa, Primeiru-Ministru (PM), Taur Matan Ruak, sei halo lansamentu ba konstusaun Institutu Politékniku Betano (IPB) iha loron 26 setembru 2022, iha munisípiu Manufahi.

“Ha’u hasoru malu ho Primeiru-Ministru kona-ba define loron ba lansamentu no hatuur fatuk dahuluk ba konstrusaun IPB nian. Ministériu deside loron hahú hosi 26 to’o 30 setembru, ne’ebé ha’u hasoru Primeiru-Ministru nia tempu ne’ebé disponível iha loron 26 setembru bele partisipa iha lansamentu ne’e,” Ministru Ensinu Superiór Siénsia no Kultura, informa hafoin hasoru malu ho Xefe Governu iha Rezidénsia Farol, segunda ne’e.

Notísia relevante: Governu prevee fundu millaun $4,5 ba konstrusaun fíziku IPB

Orsamentu ba projetu ne’e hosi Fundu Infraestrutura ho montante millaun $4,9, ne’ebé ezekuta hosi empreza Chonking Construction International hosi Xina.

“Empreza manan-na’in ne’e tanba hetan ona avaliasaun hosi Komisaun Nasionál Aprovizionamentu (CNA, sigla portugés), ne’ebé kontratu ne’e ita halo ba faze dahuluk.

Maski Governu prepara ona fundu ho montante millaun $4,5 ba konstrusaun faze dahuluk, maibé empreza manan-na’in ne’e mai ho ninia estimasaun orsamentu $3.961.658.

Orsamentu ba faze dahuluk tuir planu sei realiza konstrusaun ba morru, estrada inklui verba seluk iha IPB nia laran ba tinan ida, hafoin ba faze daruak maka sei hahú konstrusaun ba edifísiu sala aula no biblioteka sira.

Planu konstrusaun IPB ne’e maihosi referénsia Planu Estratéjiku Dezenvolvimentu Nasionál (PEDN), hahú hosi munisípiu Lautém, Manatuto, Manufahi no Covalima, ne’ebé konstrusaun ne’e sei hahú no sei sai referénsia ba instituisaun politékniku sira seluk. 

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!