PN aprova regulamentu atribuisaun prémiu Liberdade Espresaun Max Stahl
DILI, 19 setembru 2022 (TATOLI)—Parlamentu Nasionál (PN), segunda ne’e, liu-hosi reuniaun plenária aprova projetu rezolusaun PN númeru 104/V (5a) no aprova regulamentu atribuisaun prémiu liberdade espresaun Max Stahl ho rezultadu votasaun a-favór 48, kontra no abstensaun 0.
Notísia Relevante: Jornalista timór-oan tenke banati saudozu Max Stahl
“Nune’e, projetu rezolusaun PN aprova regulamentu atribuisaun prémiu liberdade espresaun Max Stahl aprovadu,” Prezidente Parlamentu Nasionál, Aniceto Longuinhos Guterres Lopes, fó sai iha sala plenária PN.
Prezidente Komisaun A trata asuntu Justisa no Konstituisional, Joaquim dos Santos, hateten PN aprova ona rezolusaun atu atribui prémiu ba sidadaun nasionál no estranjeiru ne’ebé defende direitu umanu liu-liu defende liberdade espresaun hanesan matéria ne’ebé universál defeza sidadaun sira-nia direitu.
Ho nune’e, Parlamentu Nasionál aprova regulamentu ida-ne’e atu regula oinsá atribui ba ema ne’ebé defende liberdade espresaun.
“Regulamentu ne’e sei fó podér ba Komisaun A, hahú aban, atu harii tiha ekipa juri na’in-lima depois mak sekretáriu jerál Parlamentu Nasionál sei inísia sira nia primeiru reuniaun atu hala’o servisu,” nia hateten.
Komisaun sei haree juri ne’e ema-ne’ebé iha méritu no iha kuiñesimentu kle’an kona-ba direitu umanu, direitu sidadaun, jornalizmu no seluk tan.
Deputadu Joaquim infroma, prazu kandidatu sira atu aprezenta ba prémiu liberdade espresaun Max Stahl to’o iha loron 27 outubru maibé agora sei hein anunsiu ofisiál hosi sekretáriu jerál PN, nune’e konkorente sira bele konkore.
Bainhira kandidatu sira hatama ona aplikasaun hotu mak ekipa juri sei halo selesaun ba ema na’in-tolu hafoin sei aprezenta ba Prezidente Parlamentu Nasionál mak sei hili kandidatu mellór ida-de’it, ne’ebé sei atribui prémiu iha loron masakre santa kruz 12 novembru tinan ne’e no osamentu ne’ebé PN aprova ba prémiu ba kandidadu mellor sei hetan $10.000 ho tan sertifikadu.
Notísia Relevante: Saudozu Max Stahl nia obra sai memória eterna ba timor-oan sira
Jornalista : Nelson de Sousa
Editór : Cancio Ximenes
