DILI, POLÍTIKA

PN kria komisaun eventuál ba alterasaun pakote lei tolu iha PN

PN kria komisaun eventuál ba alterasaun pakote lei tolu iha PN

Sesaun plenária Parlamentu Nasionál. Imajen/TATOLI

DILI, 19 setembru 2022 (TATOLI)—Parlamentu Nasionál (PN), liuhosi reuniaun plenária aprova projeitu rezolusaun Parlamentu Nasionál númeru 103/V (5a) kria komisaun eventuál ba revizaun Estatutu Deputadu, Lei Organizasaun no Funsionamentu Administrasaun Parlamentár (LOFAP) no Estatutu Funsionáriu Parlamentár.

Notísia Relevante: Tribunál Kámara Konta deteta regalias ba Deputadu laiha baze legál  

“Rezultadu votasaun a-favór 50, kontra no abstensaun 0, nune’e rezolusaun pasa hodi kria komisaun eventual, nune’e husu ba bankada parlamentár se ohin loron bele halo indizitasaun membru sira atu kria komisaun ne’e. Komisaun ne’e sei iha membru deputadu sira no aban dadeer sei hasai despaxuu nomeasaun membru no iha plenária, ita sei baixa kedas projetu alterasaun lei tolu sei sai kompeténsia komisaun ida-ne’e nian,” Prezidente Parlamentu Nasionál, Aniceto Longuinhos Guterres Lopes, fó sai iha sala plenária.

Iha pakote lei tolu mak atu halo revizaun hanesan parte ida hosi reforma administrasaun parlamentár no reforma ne’e inísia nu’udar forma solusaun ida atu responde rezultadu auditoria 2015 ho 2016 nian, hosi Kámara Konta ne’ebé nia relatóriu ho rekomendasaun identifika hotu ona ho responsabilidade hotu-hotu.

“Ami haree katak solusaun ida mak ita altera tiha lei tolu ne’e maibé atu trata alterasaun projetu iha ona hakarak fó hanoin tarde liu. Ita tenke aprova tinan ne’e, se lae liu ida-ne’e regalia balun ita sei lahetan hanesan regalias sira-ne’ebé ita hetan tiha ona, ita sei lahetan komesa iha 01 janeiru,” nia dehan.

Nune’e, entaun atu aselera ida-ne’e presiza iha komisaun eventuál ida mak trata la presiza ba iha komisaun espesializada permanente ne’ebé iha hodi bele trata pakote lei tolu ne’e nia alterasaun dala ida de’it.

Prezidente PN ne’e fó hanoin komisaun eventuál nia komunikasaun didi’ak atu haree ninia retroatividade lei ida-ne’e atu aprova alterasaun responde la’ós ba tinan 2015-2016 de’it, maibé ba mós tinan 2017, 2018 no 2019, nune’e tenke iha konsensu entre bankada parlamentár.

Enkuantu matéria detallu ba alterasaun pakote lei tolu ne’e seidauk bele fó sai tanba servisu sira komisaun eventuál sei diskute no apresia kle’an liután hafoin sei aprezenta ba plenária diskute no aprova.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!