iklan

NASIONÁL, INTERNASIONÁL, HEADLINE, POLÍTIKA

PR Horta husu hanoin PM Taur molok desloka ba Nova Iorke

PR Horta husu hanoin PM Taur molok desloka ba Nova Iorke

Prezidente repúblika, José Ramos-Horta. Imajen Tatoli/Francisco Sony

DILI, 19 setembru 22022 (TATOLI)–Prezidente Repúblika (PR), José Ramos Horta, segunda ne’e, hakat ba Rezidénsia Primeiru-Ministru (PM), Taur Matan Ruak, iha Farol, hodi rona hanoin ruma hosi Xefe Governu molok desloka ba Nova Iorke iha loron 21 setembru 2022.

“Ha’u agradese ba Primeiru-Ministru ne’ebé simu ona ha’u iha ne’e, ha’u mak oferese-an mai iha ne’e atu ko’alia ho Primeiru-Ministru tan de’it bainrua (kuarta) arranka bá Nova Iorke. Tanba ne’e ha’u hakarak rona preokupasaun Governu hosi Primeiru-Ministru, asuntu ruma Governu hakarak tau iha Prezidente-nia diskursu atu ko’alia,” PR Horta hateten hafoin hasoru malu ho Xefe Governu.

Notísia relevante: PR Horta planeia vizita tan nasaun tolu iha tinan ne’e

Daudaun prepara ona diskursu, nune’e bainhira prontu ona maka sei haruka ba Primeiru-Ministru atu haree. Diskursu ne’ebé prepara antes ne’e halo mós konsutasaun ho Ministériu Negósiu Estranjeiru no Kooperasaun (MNEK).

“Asuntu ne’ebé ha’u sei ko’alia iha Asembleia Jerál ne’e mak asuntu nasionál, ne’ebé ha’u hakerek ona kona-ba maneira como Timor-Leste enfrenta ho efikásia prevensaun COVID-19, Timor-Leste konsege duni kontrola ka halo jestaun di’ak ba COVID-19 maski momentu ne’ebá laiha ida mak iha esperiénsia tantu komunidade internasionál no medida ne’ebé Governu halo para impaktu ekonómiku sosiál ba kiak sira labele boot demais, ita haree konsege duni,” nia haktuir.

Aleinde ne’e, Xefe Estadu mós sei ko’alia kona-ba situasaun funu Ukrania ne’ebé fó impaktu ba situasaun internasionál. Nune’e mós preparasaun Timor-Leste tama Asosiasaun País Sudeste Aziátiku (ASEAN, sigla inglés) no Organizaun Mundiál Komersiál (WTO, sigla inglés).

“Primeiru-Ministru fó Liberdade totál ba Prezidente Repúblika atu ko’alia maibé ha’u nu’udar Xefe Estadu ha’u lako’alia nu’udar ha’u-nia naran pesoál, ha’u lori naran Estadu, entaun ha’u-nia diskursu kuaze bele hateten relatóriu ida hosi Timor-Leste nian ba komunidade internasionál kona-ba progresu iha paz no seguransa iha rai-laran inklui iha polítika toleránsia rekonsiliasaun Timor-Leste,” nia tenik.

Xefe Estadu sei arranka ba Nova Iorke iha kuarta (21/09/2022) atu partisipa iha Asembleia Jerál ONU no hetan oráriu atu halo diskursu ba plenária iha dadeer iha loron 23 setembru, nune’e hato’o diskursu mós iha sesaun espesiál ida kona-ba Komisaun Harii Páz iha loron 26 setembru.

Jornalista   : Antónia Gusmão

Editora        : Julia Chatarina  

iklan
iklan

Leave a Reply

iklan
error: Content is protected !!