iklan

COVALIMA, INKLUZAUN SOSIÁL

SEII selebra akordu apoiu subsídiu ba grupu sia iha Covalima

SEII selebra akordu apoiu subsídiu ba grupu sia iha Covalima

SEII selebra akordu apoiu subsídiu ba grupu sia iha Covalima. Imajen Tatoli/Celestina Teles.

COVALIMA, 19 setembru 2022 (TATOLI)—Sekretária Estadu Igualdade no Inkluzaun (SEII), Maria do Rosario Fátima Correia, selebra akordu apoiu subsídiu ba grupu sia (9) hodi halo negósiu iha Covalima.

“Ohin, asina akordu ho grupu sia iha munisípiu Covalima depende rekomedasaun hosi xefe suku sira pontu fokál munisípiu hato’o informasaun ba grupu sira, fundu ne’e mai hosi rubrika transferénsia públika ho mekanizmu rotative,” Maria do Rosario Fátima Correia hateten ba jornalista sira, iha salaun postu administrativu Suai, Tabakolot, segunda ne’e.

Fundu ho tipu rotativa ne’e hanesan grupu ne’ebé haki’ak manu no karau bainhira sira hetan benefísiu ona hosi atividade negósiu refere hanesan osan iha ona funan no osan inan refere ne’e entrega fali ba grupu seluk.

Tuir dadus grupu 41 mak eziste iha Covalima hosi númeru ne’e na’in-ida mak ema ho vulneravél atu asesu, maibé sira-nia mekanizmu la’ós rotativa hodi halo negósiu no pontu fokál SEII avalia atividade negósiu.

Subsidiu ne’e, SEII transfere ona ba sentru empoderamentu munisípiu Covalima hodi bele transfere ba grupu benefisiáriu liuhosi sira-nia konta bankaria no tenke rejista iha SERVE, I.P bainhira halo negósiu ho di’ak bele asesu kréditu suave hanesan fó motivasaun ba sira.

Maske hasoru dezafiu halo sira metin iha fatin no buka estratéjia oioin hanesan proposta haki’ak manu maibé negosiu sira seluk mak halo di’akliu hodi fó benefísiu hanesan faan obralan (OB) depende sira-nia estratéjia

Reprezentante Adminustradór Covalima, Francisco Mendonça “Raan Nakali” husu ba grupu sira atu uza ho loloos hodi halo negósiu nune’e bele halo mudansa ba moris.

“Ita-boot grupu benefísia hodi hetan subsídiu servisu grupu ida-ne’e tenke loloos tanba ha’u-nia dirasaun mós tenke hatene no tenke halo koordenasaun, tanba ha’u-nia servisu mós atu kontrola grupu sira-ne’ebé mak benefísia hosi osan Estadu,” nia esplika.

Subsídiu ne’e aplika ho rotativa bainhira ho orsamentu grupu susesu ona bele entrega ona ba grupo sira seluk hodi bele hala’o negósiu tanba ne’e tenke jere ho kuidadu.

“Grupu dahuluk tenke servisu ho di’ak, labele hanoin ita Covalima hodi hasai osan ba lia, responsável grupu bainhira katuas oan atu estraga osan ne’e labele. Ha’u fiar feto sira sei  benefísia, ne’e ha’u hatene ita-nia pontu fokál haree di’ak no sira mós halo selesaun iha ita-boot sira hetan fundu refere,” nia hateten.

Grupu sia ne’ebé asina akordu ho SEII ho orsamentu hamutuk $18,000.00 ne’e fó apoiu ba grupu sira hanesan grupu Nei Man ho atividade negósiu loke rentál lokaliza iha postu Suai, suku Debos ho orsamentu 2,000.00, grupu feto Matadalan Bei-Seuk iha postu Tilomar, suku Beiseuk ho  atividade loke kioske ho orsamentu $2,000.00 hosi postu Tilomar.

Grupo Quimaki ho atividade negósiu hakiak karau, iha postu Zumalai, suku Lour ho orsamentu $2,000.00, grupo Tasi Lomea ho atividade negósiu loke kioske iha postu Zumalai, suku Lour ho orsamentu 2,000.00, grupu feto Laloran ho atividade negósiu soru tais iha postu Fatululik, suku Fatululik.

Grupu Raimutik ho atividade negósiu haki’ak manu-lokál, osi postu Maucatar, suku Matai ho orsamentu $2,000.00, grupu Husik Terus ba Moris Di’ak, hakiak manu lokál hosi postu Fohorem, suku Fohorem ho orsamentu $2,000.00.

Grupu Tatoli Lia-Menon ho atividade negósiu soru tais hosi postu Fohorem, suku Dato-Tolu ho orsamentu $2,000.00 no grupu Feti Laktuma Buras ho atividade negósiu loke kioske iha postu Fohorem, suku Dato-Rua.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!