HEADLINE, JUSTISA

TDD husu defeza arguida Emilia Pires arola deklarasaun sasin-sira

TDD husu defeza arguida Emilia Pires arola deklarasaun sasin-sira

Arguida Eis-Ministra Finansa, Emilia Pires. Imajen/espesiál

DILI, 19 setembru 2022 (TATOLI)— Tribunál Distritál Dili (TDD), segunda ne’e, kontinua halo julgamentu ba arguida Eis Ministra Finansa Emilia Pires no eis Vise Ministra Saúde, Madalena Hanjam, kona-ba projetu akizasaun kama elétriku ba Hospitál Nasionál Guido Valadares (HNGV) iha tinan 2016.

Tanba, iha momentu Emilia Pires asume kargu Ministra Finansa no Madalena Hanjam nu’udar Vise Minisrra Saúde, halo akizasaun kama elétriku ba HNGV ho montante millaun $1, ne’ebé deskonfia komete krime partsipasaun ekonomia no negósiu ne’ebé previstu iha artigu 299 iha Kódigu Penál Timor-Leste.

Ho nune’e, iha rejulgamentu ohin, TDD liuhosi juis koletivu José Maria husu no fó tempu loron-rua ba parte Defeza arguida Emilia Pires no Madalena Hanjam, atu konfirma auto ka arola fali deklarasaun sasin sira nian, ne’ebé antes ne’e fó sasin ba arguida nain-rua iha prosesu julgamentu.

“Ami Defeza hosi arguida nain-rua atubele haree fila fali deklarasaun sasin sira ne’ebé maka inportante atubele informa fali ba tribunal, durante loron rua nia laran, hodi tribunál bele deside leitura akordaun ba arguida nain-rua nian kazu,” hateten Advogadu Privadu Arguida nain-rua, José Guterres  ba jornalista sira iha TDD, Segunda  ne’e.

Antes ne’e, iha prosesu rejulgamentu ba kazu ne’e , Ministeriu Públiku (MP) ne’ebé reprezenta hosi Prokuradór Rogerio Viegas, husu tribunál atu notifika Arguidu Emilia Pires nian paradeiru, nune’e bele repatria mai timór atu tuir prosesu julgamentu ba kazu ne’e.

Tanba tuir prosesuál rejulgamentu nian tribunál tenke rona parte rua, maibé arguida Madalena Hanjam mesak mak marka prezensa, maibé arguida Emilia Pires la marka prezensa no to’o agora tribunál seidauk fiksa no identifika paradeiru Emilia Pires nian.

Ministeriu Públiku husu tribunál atu fiksa editál ba arguida, tuir kódigu prosesu penál artigu 257 nian, sé arguidu la marka presenza iha tribunál hodi tuir julgamentu  iha tempu tuir mai bele reprezenta hosi nia defeza.

Entretantu, Defeza eis Ministra Finansa ne’e notifikasaun ba arguidu  tenke ba pesoál, maibe se notifikasaun pesoál laiha ona, bele notifika editál tuir artigu 257 kódigu prosesu penál.

Hafoin rona pedidu hosi parte hotu, Juís Prosesu, José Maria no Fransisca Cabral, deside hodi notifika arguida Emilia pires ho editál tuir kódigu prosesu penál artigu 257. Katak kuandu julgamentu tuir mai arguida Emilia Pires la marka prezensa iha julgamentu defeza maka sei reprezenta arguida hodi hakat ba julgamentu.

Tuir artigu 257 hosi Kódigu Prosesu Penál, sita pontu tolu importante, mak, pontu dahuluk kuandu arguidu hetan tiha Termu Identidade Rezidénsia (TIR) no labele halo notifikasaun pesoál ba nia kona-bá despasu ne’ebé marka loron ba julgamentu no detensaun atu lori nia mai audénsia inklui tenke taka editál iha morada ne’ebé nia hatudu iha TIR hodi notifika nia.

Pontu daruak, sita notifikasaun editál ne’e tenke halo loron 20, antes data foun ba julgamentu no aviza katak nia la mai karik julgamentu ne’e, nia-defensór mak sei reprezenta nian.

Enkuantu pontu ikus liu katak notifikasaun editál la impede atu hasai mandadu ba detensaun ka kaptura.

Audiénsia Julgamentu prezide hosi juis koletivu José Maria, Francisca Cabral, Maria Solana, Ministériu Públiku reprezenta husi Prokuradór Rogério Viegas no arguida na’in-rua hetan asisténsia legál hosi Advogadu privadu José Guterres ho Soraya Marques.

Notísia relevante:La marka prezensa iha julgamentu, MP husu Tribunál notifika arguida Emilia Pires

Jornalista: Natalino Costa

Editór        : Florencio Miranda Ximenes

iklan
iklan

Leave a Reply

iklan
error: Content is protected !!