VIQUEQUE, 19 setembru 2022 (TATOLI)–Oan hosi veterana Rezina dos Anjos, Juvencio António Amaral Brandão, husu ba Governu hodi transporta ninia inan ne’ebé hetan moras tuberkoloze ho kondisaun moderadu bá Hospital Nacional Guidi Valadares (HNGV) hodi hetan tratamentu.
“Ha’u nu’udar oan, hakarak husu Governu transporta lalais ha’u-nia inan bá ospitál nasionál hodi hetan tratamentu tanba nia mós kontribui ba luta libertasaun independénsia. Tanba ne’e presiza halo tratamentu espesiál hodi bele rekupera fali,” Juvencio António hateten iha Internamentu Viqueque, segunda ne’e.
Nia haktuir, veterana ne’e moras durante fulan-tolu ona, maibé mear orbainrua ne’e maka maka’as, nune’e família sira lori kedan ba ospitál hodi hetan tratamentu.
“Moras maka’as ne’e iha sábadu kalan iha loron 17 semtebru 2022, banhira kari ai-funan ba masakre Kararas, fila bá uma kalan ne’e nia komesa moras. Nune’e iha domingu kalan ami lori mai baixa tiha iha internamentu Viqueque,” nia akresenta.
Notísia relevante: Servisu Saúde Viqueque rejista kazu TBC 285
Nia konta tuir, Rezina dos Anjos nu’udar veterana iha tempu okupasaun Indonézia no envolve iha Organização Popular da Mulher de Timor (OPMT), hafoin akontesimentu tinan 1983 Kararas hotu mak nia bá fali suku Bibileo hodi kontinua halo klandestina.
“Maibé antes ne’e, ha’u-nia mãe fó seguransa ba Prezidente Francisco Xavier do Amaral ne’ebé hetan kastigu iha rai Liu-Leki. Ohin dadeer Konsellu Veteranu munisípiu Viqueque no funsionáriu hosi Ministériu Asuntu Kombatente Libertasaun Nasionál ne’ebé destaka iha munisípiu Viqueque maka haree no koordena ho médiku sira atu transporta bá Dili, maibé to’o agora seidauk transfere,” nia tenik.
Iha fatin hanesan, Médiku Internamentu Viqueque, Hermigildo Pereira, relata, simu preokupasaun hosi veterana Rezina dos Anjos, katak kakorok bubu, mear no durante ne’e família sira tenta halo tratamentu tradisionál iha uma maibé la rekopera.
“Konsellu Veteranu munisípiu Viqueque maka obriga veterana ne’e hodi mai halo tratamentu iha Internamentu. Pasiente ne’e to’o iha internamentu ami halo diagnóstiku katak suspeitu ba TB pulmunál no kakorok laran kanek hodi halo pasiente han ladi’ak. Portantu indika halo mear tasak no orsida mak laboratóriu fó rezultadu,” nia esplika.
Tuir Médiku, pasiente nia kondisaun jerál daudaun ne’e moderadu no presiza halo tratamentu, tanba ne’e sei halo koordenasaun ho parte ambulánsia hodi transporta ba HNGV.
“Ami sei koordena ho parte ambulánsia hodi halo koordenasaun ba ambulánsia nasionál , liu-liu parte aviasaun hodi transfere pasiente ba HNGV. Ami mós halo konsultasaun ho ospitál nasionál hodi relata diagnóstika ba médiku sira iha ospitál nasionál,” nia hato’o.
Veterana Rezina Dos Anjos ho idade 70 hosi suku Bibileo, postu adiministrativu Viqueque Vila, munisípiu Viqueque, daudaun ne’e sei baixa hela iha internamentu Viqueque Vila.
Jornalista : Vitorino Lopes da Costa
Editora : Julia Chatarina
