iklan

NASIONÁL, INTERNASIONÁL, POLÍTIKA

Vise PM Santa Sé: Timor-Leste nasaun dahuluk proklama fraternidade umana

Vise PM Santa Sé: Timor-Leste nasaun dahuluk proklama fraternidade umana

Vise Primeiru-ministru Santa Sé, Arsebispu Edgar Peña Parra

DILI, 19 setembru 2022 (TATOLI)–Vise Primeiru-Ministru (PM) Santa Sé ne’ebé subtitui hosi Sekretária Estadu, Arsebispu Edgar Peña Parra, hateten Timor-Leste hanesan nasaun dahuluk proklama fraternidade umana no moris hamutuk ho fraterna.

Notísia Relevante: PR Horta-Vise PM Santa Sé lansa Sentru Fraternidade Umana Timor-Leste

Prezidente Repúblika, José Ramos-Horta bainhira simu Vise Primeiru-Ministru Santa Sé, Arsebispu Edgar Peña Parra, antes asina faktu Centru da Fraternidade Humana Timor-Leste Para Paz Mundial e Convivência Comum, iha Palásiu Prezidente Nicolau Lobato, Bairru Pite, segunda (19/09). Imajen Tatoli/António Daciparu.

Nia hateten, ita ida-idak iha relijiaun hanesan katólika, musulmanu, budista ho relijiaun sira seluk iha mundu tenke fó testamuña ba saida mak ita fiar no testamuña loos mak fraternidade umana.

“Fraternidade umana tuir pontu de vista relijiaun katak ema hotu maun alin. Estadu Timor-Leste hanesan nasaun dahuluk ne’ebé proklama fraternidade umana no moris hamutuk ho fraterna,” Vise PM Santa Sé ne’e hato’o iha diskursu iha serimónia lansamentu sentru fraternidade umana Timor-Leste em prol pás mundiál iha Palásiu Prezidensiál Nicolau Lobato, Bairru Pite, segunda ne’e.

Nia dezeju iha lansamentu sentru Fraternidade Umana Timor-Leste ne’e ho lidér órgaun soberania no autoridade hotu nasaun ne’e nian ho kompromisiu ida iha orasaun atu nafatin reza ba Timor-Leste atu moris iha fraternidade no ema hotu hakmatek.

Pás no fraternidade importante tanba laiha nasaun ida-ne’ebé moris laiha fraternidade umana, hanesan Papa Francisaco dehan ‘bainhira funu hotu-hotu lakon no bainhira pás hotu-hotu manán’, no iha oportunidade atu dezenvolve prioridade sira ba oin ho sentidu ba finalidade ida  moris hanesan umanu mak importante fiar nia vontade, forsa no korajen hodi servisu ba harii pás.

“Pás ita sei la hetan iha dalan maibé ita tenke konstrui pás. Kada ema ida-idak hodi bele iha pás no fraternidade nia laran no fraternidade mak baze ba pás ne’ebé kontinua promove aktu sira- ne’ebé kontribui ba moris hakmatek sosiedade,” nia apela.

Nia hateten, momentu ne’e oinsa ema hotu hanoin ba nasaun sira-ne’ebé enfrenta funu hodi  lakon buat hotu hanesan dame, lakon dame pesoál no dame sosiál.

Nune’e, nia parte agradese ba Prezidente Repúblika ho autoridade Timor-Leste no parte hotu kontinua servisu ba pás mundiál.

Notísia Relevante: Vice-Pirmeiru Ministru Santa Sé to’o ona iha Timor-Leste

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!