DILI, 19 setembru 2022 (TATOLI)—Vise Primeiru-Ministru Santa Sé ne’ebé substitui hosi Sekretária Estadu, Arsebispu Edgar Peña Parra, segunda ne’e, to’o ona iha iha Timor-Leste iha Aeroportu Internasionál Nicolau Lobato, Comoro, iha tuku 12h20, ho aviaun Citilink PK-GQP.
Notísia Relevante: Vizita Vise PM Santa Se nu’udar preparasaun Papa Francisco atu vizita Timor-Leste
Vizita simu hosi simu direta hosi Xefe Komisaun Organizadora, Padre Guilhermino da Silva. Hosi ne’e, hetan akonpana hosi Sua Eminénsia, Dom Virgilio Kardeál Do Carmo da Silva, SDB, Bispu Dioseze Maliana, Don Norbertu Amarál, Núnsiu Apostólika Rezidente iha Malázia no Enkarregadu Negósiu Rezidente iha Timor-Leste, Reprezentante Santa Sé iha Timor-Leste no mós Vice Ministru Negósiu Estranjeiru no Kooperasaun (MNEK), Julião da Silva.
Aleinde ne’e, kulturalmente, vizita Vise Primeiru-Ministru Santa Sé ne’e, sei simu ho tara (kae) tais no sergala (lia dadolin) hosi grupu Karketu Mota-Ain no dansa tradisionál hosi grupu kulturál Leziaval.
Tuir oráriu, Vise Primeiru-Ministru Santa Se ne’ebé substitui hosi Sekretária Estadu, Arsebispu Edgar Peña Parra, iha tuku 15h45 sei halo enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite.
Hafoin ne’e, iha tuku 16h15, sei halo lansamentu ba sentru Fraternidade Umana Timor-Leste no Páz Mundiál iha Palásiu Prezidensiál, ne’ebé sei partisipa hosi reprzentante relijiaun hotu-hotu ne’ebé eziste iha Timor-Leste, no sei breve meditaaun hosi Dom Visrgílio Kardeál do Carmo da Silva, SDB.
Iha tuku 18h00 kalan, Arsebispu Edgar Peña Parra sei partisipa iha serimónia Grand Finál Korál no Vokál Grupu konsilidasaun Fraternidade Humana “Taxa Avo Nana 2022” iha salaun Delta Nova no Prezidente Repúblika, José Ramos Horta, sei oferese Jantar konfraternizasaun.
Biografia
Vise Primeiru-Ministru Santa Sé substitui hosi Sekretária Estadu, Arsebispu Edgar Peña Parra (moris iha Maracaiobo, 08 marsu 1960) nu’udar bispu no diplomata Venezuela hosi Igreja Katólia, no daudaun ne’e hanesan Vise-Ministru Estranjeiru iha Santa Sé.
Nia servisu hamutuk ho korpu diplomátiku Santa Sé iha tinan 1993, asume kargu nu’udar Núnsiu Apostóliku ba Pakistaun hosi 2011 to’o 2014 no iha Mozambike hosi 2014 to’o 2018. Nia hanesan ema Venezuela dahuluk ne’ebé asume kargu nu’udar Núnsiu Apostóliku.
Edgar Peña Parra bele ko’alia dalen España, Itália, Iglés, Fransa, Portugés no Serbo-Kroasia.
Nia simu formasaun relijioza nian iha seminariu Maracaibo no ordena sai Nai Lulik katólika iha Maracaibo, Venezuela, iha loron 23 agostu 1985, iha Basilica de Nossa Senhora de Chiquinquirá, hosi arsebispu Domingo Roa Pérez,
Hosi tinan 1986, nia partisipa iha Pontifísia Akademia Eklesiátika, iha ne’ebé nia finaliza nia estudu iha direitu kanóniku ho teze “Os Direitos Humanos no Sistema Interamericano à Luz do Magistério Pontifício”, ne’ebé tuir Crux, “sai tiha ona referénsia ba estudu kona-ba direitu umanu (“se tornou um referência para o estudo dos direitos humanos”).
Nia hahú hala’o servisu diplomátiku iha Santa Sé iha 01 abríl 1993. Nia kumpre designasaun hodi hala’o servisu iha Quénia, Iugoslávia, Áfrika do súl, Honduras no México, no iha eskritóriu reprezentante Santa Sé iha Organizasaun Nasaun Unida (ONU) iha Jenebra.
Iha loron 08 janeiru 2011, Papa Bento XVI nomea nia sai arsebispu titulár ba Telepte no nomea nia sai nu’udar Núnsiu Apostóliku.
Iha loron 02 fevereiru 2011, Papa Bento XVI nomea nia sai hanesan Núnsiu Apostóliku ba Pakistaun.
Nia simu Konsagrasaun Episkopál iha 05 fevereiru 2011 hosi Papa Bento XVI iha Basilica São Pedro ho lema “FIAT VOLUNTAS TUA” (Jadilah Menurut Kehendak-Mu), ho kardeál Angelo Sodano no Tarcisio Bertone hanesan ko-konsagradores.
Iha 21 fevereiru 2015, Papa Francisco nomea nia sai Núnsiu Apostóliku ba Mozambike.
Nia nemadu Substitui Asuntu Jerál Sekretaria Estadu iha loron 15 agostu 2018.
Edgar Peña Parra, Edgar Robinson (1993), hakerek ona livru “Os Direitos Humanos no Sistema Interamericano à Luz do Magistério Pontifício”.
Notísia Relevante: Vise Primeiru-Ministru Vatikanu vizita Timor-Leste iha setembru
Jornalista : Nelia Fernandes
Editór : Cancio Ximenes
