KAPITÁL, NASIONÁL

Vizita Vise PM Santa Se nu’udar preparasaun Papa Francisco atu vizita Timor-Leste

Vizita Vise PM Santa Se nu’udar preparasaun Papa Francisco atu vizita Timor-Leste

Arsebispu Arkidioseze Metropolitana Dili, Don Virgílio do Carmo da Silva, SDB, kaer liman ho Papa Francisco iha Vatikanu. Imajen/Espesial.

DILI, 16 setembru 2022 (TATOLI)—Prezidente Komisaun Organizadora, Padre Guilhermino da Silva, informa Vsce Primeiru-Ministru Santa Sé ne’ebé Substitui hosi Sekretária Estadu, Arsebispu Edgar Peña Parra, sei vizita Timor-Leste iha loron 19 setembru 2022.

Notísia Relevante: Don Virgílio Kardeál do Carmo: Papa Francisco disponível vizita Timor-Leste

Padre Guilhermino da Silva hatutan, iha vizita ida-ne’e, Reprezentante Vise Primeiru-Ministru Santa Sé, Arsebispu Edgar Peña Parra, hanesan vizita preparasaun ba Amo Papa Francisco nia vizita iha Timor-Leste iha 2023.

Amu Papa Francisco realiza enkontru ho enviadu Espesiál Extraordináriu Prezidente Repúlika, Kay Rala Xanana Gusmão, iha loron 25 agostu ne’e. Imajen/epesiál.

“Ita hotu hatene ona, Maun Boot Kayrala Xanana Gusmão rasik ba to’o ona iha Vatikanu hasoru malu ho Amu Papa no konvida direta Papa Francisco atu bele vizita iha Timor-Leste. Nune’e, mós ita-nia Kardeál nia hasoru malu ho Amu Papa iha Vatikanu mós hameno ona ba Kardeál katak Papa Francisco sei vizita Timor-Leste. Entaun, ida ne’e hanesan reprezentante ida-ne’ebé bele dehan komesa haree daudaun ona, se posivel Papa Francisco bele mai vizita Timor-Leste ka lae,” Padre Guilhermino da Silva hateten ba jornalista sira, liuhosi konferensia imprensa, iha salaun igreja Motael, Díli, sesta ne’e.

Tanba ne’e, nu’udar Prezidente Komisaun Organizadora husu ba públiku no sarani katólika sira iha Timot-Leste atu bele hatudu ita-nia animu iha vizita ida-ne’e, liu-liu partisipa misa ne’ebé sei hala’o iha kinta (22/09) lorokraik iha Katedrál, hodi hatudu sarani sira-nia animu katak Timor-Leste prontu atu simu Papa Francisco iha tinan 2023-tinan oin mai.

Vizita ida-ne’e, hanesan vizita Estadu ida-ne’ebé mai iha Timor-Leste liu-liu atu hanoin fila-fali relasaun bilaterál entre Santa Sé ho Estadu Timor-Leste ne’ebé halo ona ba tinan 20.

Reprezentante Vise Primeiru-Ministru Santa Sé, Arsebispu Edgar Peña Parra, hanesan ema-ne’ebé besik liu Amu Papa Francisco terseira pesoa iha Vatikanu iha Papa nia sorin, hanesan ema ida-ne’ebé loro-loron hasoru malu ho Papa ne’ebé hamatan ba asuntu sira igreja nian iha mundu tomak.

Notísia Relevante: “Papa Francisco dehan ba ha’u, tau matan didi’ak ba sarani sira”

Arsebispu Edgar Peña Parra sei hala’o vizita iha Timor-Leste durante loron lima (5) nian laran, ne’ebé hahú hosi 19 to’o 23 iha fulan setembru tinan 2022.

Tuir nia, iha nia vizita ne’e sei hala’o mós programa sira hanesan pálestra kona-ba Fraternidade Umana iha Universidade Katólika Timorense, sei halo lansamentu Fraternidade iha Palásiu Prezidente no sei iha mós selebrasaun misa hamutuk ho sarani tomak iha Dili laran ne’ebé sei hala’o iha kinta (22/09), iha tuku 17h00 lorokraik, iha Igreja Katedrál Dili.

Kona-ba misa ne’ebé sei hala’o iha kinta (22/09), iha tuku 17h00 lorokraik ne’e, sei partisipa mós sarani sira iha Dili nomós karik iha posibilidade sarani sira hosi Dioseze  Baucau no Maliana mós sei partisipa.

“Maibé, konserteza iha Bispu tolu, hamutuk ho nunsíu, ita-nia Kardeál, ita-nia Prezidente Konferensia Episkopál Timorense, Bispu Don Norbertu no mós Padre Alipio nu’udar Administradór Dioseze Baucau nian sei partisipa,” nia dehan.

Aleinde ne’e, Arsebispu Edgar Peña Parra, sei halo mós inaugurasaun ba konstrusaun uma Nunciatura Apostólica Embaixada Santa Sé iha Dili ne’ebé konstrui iha Igreja Motaél nia sorin, ne’ebé tuir planu sei inaugura iha tersa (20/09), iha tuku 17h00 lorokraik.

Iha inaugurasaun ne’e, sei partisipa hosi órgaun soberania tomak, membru Governu no membru PN sira no mós relijiozu no relijioza, Arsebispu-Kardeál no Prezidente Konferensia Episkopál Timorense no nunsiu hosi Malázia ne’ebé mós tau matan ba Malázia no Timor-Leste.

Nune’e mós, repereentante Vise-Primeiru Ministru Santa Sé ne’e mós sei halo semináriu loron ida iha Universidade Katólika Timorense, iha tersa (20/09), ho tema Fraternidade Umana liu-liu   dokumentu ne’ebé Amo Papa fó sai ona iha Abudabi (2019).

“Ita-nia partisipante sira nafatin membru Governu, Órgaun Soberanu sira, Reprezentante ONU iha Timor-Leste, Estudante UCT, Dosente, Profesór sira iha UCT no mós iha konvidadu balun ne’ebé universidade katólika nu’udar koordenadór sei konvida mós sira atu bele partisipa iha serimónia ne’e. Entaun, konvidadu ne’ebé Universidade Katólika konvida hamutuk 250 no totál ema-ne’ebé sei atende semináriu hamutuk 400, tuir universidade katólika nia planu no preparasaun,” nia informa.

Notísia Relevante: Papa Francisco agradese esforsu TL promove dame no toleránsia

Jornalista : Nelia Fernandes

Editór        : Cancio Ximenes

iklan
iklan

Leave a Reply

iklan
error: Content is protected !!