iklan

NASIONÁL, DILI

“Papa Francisco dehan ba ha’u, tau matan didi’ak ba sarani sira”

“Papa Francisco dehan ba ha’u, tau matan didi’ak ba sarani sira”

Don Virgílio Kardeál do Carmo da Silva, SDB. Imajen Tatoli/António Daciparu.

DILI, 05 setembru 2022 (TATOLI)—Don Virgílio Kardeál do Carmo da Silva, SDB, hateten Papa Francisco sente kontente tanba komunidade timoroan barak mák partisipa serimónia konsistóriu ordináriu públiku (investidura) ba bispu na’in-21 iha 27 agostu 2022 iha Basilika Santu Pedro Vatikanu-Roma.

Don Virgílio Kardeál do Carmo da Silva hatutan, iha biban ne’e Papa Prancisco tatoli ba kardeál sira hotu no hameno ba nia katak tau matan didi’ak ba povu no sarani sira iha Timor-Leste.

Notísia Relevante: Kardeál Virgílio: “Ksolok ne’e la’ós ba ha’u maibé ba igreja no povu TL”

Don Virgílio Kardeál do Carmo da Silva, SDB. Imajen Tatoli/António Daciparu.

“Amo Papa dehan liafuan ida de’it; ‘Tau matan didi’ak ba ó-nia bibi sira. Tau matan didi’ak ba ó-nia povu no sarani’. Liafuan ida-ne’e mak Papa Francisco dehan hela mai ha’u,” Don Virgílio Kardeál do Carmo da Silva, SDB, hateten ba jornalista sira liuhosi Konferénsia Imprensa iha Aeroportu Internasionál Nicolau Lobato, Comoro, Dili, hafoin fila hikas hosi Roma-Itália, segunda ne’e.

Iha biban ne’e, nia esplika, iha prosesu nomeasaun ne’e, kna’ar kardeál sira sei kolabora hodi fó apoiu ba vatikanu nia servisu.

“Kna’ar kardeál nian, hanesan Amo Papa iha loron dahuluk ne’ebé fó sai nomeasaun kardeál foun sira dehan, dahuluk kolaboradór Amo Papa ninian. Ida-ne’e katak maske hela dook iha ne’e maibé nafatin nakloke atu kolabora fó apoiu ba servisu oioin ne’ebé hosi vatikanu. Kuandu Amo Papa presiza ami-nia apoia, prontu nafatin atu fó apoiu liu-liu atu kontinua haburas, hametin no haklaken Maromak nia liafuan iha ita-nia rai doben Timor-Leste. Kna’ar kardeál nian liu-liu atu fó apoiu mais direta ba servisu hamutuk ho Santu Padre.,” nia dehan.

Tanba ne’e, Don Virgílio Kardeál do Carmo da Silva, ne’ebé hetan nomeasaun hodí sai Kardeál dahuluk iha Uma Kréda Timor-Leste nian ne’e fó agradesimentu ba sarani hotu nia domin ne’ebé manifesta liuhosi dalan oioin.

“Aproveita oportunidade ne’e hakarak atu agradese fó obrigadu. Dahuluk, agradese ba timoroan no sarani tomak ba ita-boot sira-nia domin no ba ita-boot sira-nia ksolok ne’ebé ita hatudu ba malu iha loron hirak nia laran. Domin no ksolok ida ne’e ha’u simu pesoalmente, maibé ha’u mós hakarak atu partilla fila-fali agradese ba imi-nia domin no ksolok ne’ebé manifesta liuhosi dalan oioin durante loron hirak nia laran no ita sei kontinua nafatin to’o aban,” nia dehan.

Liuhosi ne’e, bibi atan ne’e agradese partikularmente ba nai-ulun sira-ne’ebé durante ne’e fó apoiu hodi partisipa serimónia konsistóriu ordináriu públiku (investidura) iha Roma.

“Partikulármente hakarak agradese ita-nia Nai Prezidente Repúblika, máske labele partisipa iha ne’ebá, maibé delega ekipa ida ne’ebé xefia hosi Xanana Gusmão ho nia ekipa ba partisipa eventu iha ne’ebá hosi inísiu to’o hotu. Agradese mós ba Primeiru Ministru, máske labele to’o iha ne’ebá, maibé delega ekipa ida-ne’ebé xefia hosi Ministru, Fideles Magalhães hamutuk ho Ministru José Lucas ne’ebé reprezenta ita-nia Governu ba partisipa eventu ida ne’e,” nia apela.

Nune’e, agradese mós ba Prezidente Parlamentu Nasionál, tanba Parlamentu mós delega ekipa ida ne’ebé xefia hosi Deputada Angelina hodi ba partisipa iha eventu ida-ne’e. Agradese ba ema oioin no ba embaixadora Timor nian iha Vatikanu ho nia ekipa tomak ne’ebé apoiu hodí hala’o ba servisu oioin durante iha Roma.

Nia dehan, hamutuk ho embaixadora hakarak agradese ba komunidade timoroan sira hanesan padre no madre sira iha Roma, hamutuk ho sira timoroan sira hosi Erlanda, Inglatera, Portugál ne’ebé mós ba tuir selebrasaun ida-ne’e.

Lahaluha hato’o agradesimentu ba embaixadora Timor nian iha Portugal ho nia ekipa, embaixadora Timor nian ba CPLP iha Portugál, Sekretária eis-jerál G7+ ho nia ekipa, ba sira hotu nia apoiu, durante loron hirak bainhira liuhosi Roma mai iha Portugál bo agradese mós ba komunidade salesiána, kaza próvinsiál iha Évora sira-nia apoiu.

Aliende ne’e, Kardeál dahuluk Timor-Leste nian, agradese mós ba uma kréda Timor nian ba konferénsia Episkopál Timor, ba Pe. Ivo Martins, ekónomo Dioseze nian ne’ebé akompaña Don Virgílio Kardeál do Carmo ba Roma, maibé ikus hetan moras no agora nia baixa hela iha Hospitál Portugál.

“Ne’ebé, ita reza ba nia atu rekupera lalais. Hein katak iha semana ida no rua nia bele tuir mai,” nia dehan.

Kardeál dahuluk uma kreda Timor-Leste nian ne’e hato’o agradesimentu ba ema hotu nia tulun, ksolok no domin ne’ebé liuhosi dalan oioin fó ba Kardeál.

“Ita hatudu ita-nia Uma kréda, sai dalan ida ba ita hodi haburas liutan ita-nia kréda iha ita-nia rai doben Timor-Leste,” nia apela.

Notísia Relevante: Kardeál Timor-Leste lori Estadu nia kualidade iha internasionál no Vatikanu

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!