iklan

EKONOMIA, HEADLINE

AUPTL husu Governu buka alternativa ba ajénsia estivadór iha Portu Dili

AUPTL husu Governu buka alternativa ba ajénsia estivadór iha Portu Dili

Kontentór iha Portu Dili. Imajen Tatoli/Egas Cristóvão

DILI, 20 setembru 2022 (TATOLI)—Asosiasaun Uzuáriu Portu Timor-Leste (AUPTL) husu Governu buka alternativa ba ajénsia estivadór ne’ebé durante ne’e servisu iha Portu Dili, relasiona ho atividade deskargamentu iha Portu Dili ne’ebé sei muda bá Portu Tibar.

“Ita hotu hatene, iha loron 30 setembru agora kontentór hotu sei halo deskargamentu iha Portu Tibar. Ami nu’udar ajénsia estivadór ne’ebé durante servisu tinan-20 resin iha Portu Dili sei abandonadu. Ami husu Governu buka dalan alternativa ka fó kompensasaun nune’e ami kontinua halo atividade ne’ebé ami bele halo tanba ami agora sai vítima ba mudansa Portu Dili bá Tibar,” Diretór empreza Ariana, Constâncio Guterres, ne’ebé halibur iha AUPTL, hateten iha Bairru-Pité, tersa ne’e.

Notísia relevante: Portu Tibar halo deskarregamentu dahuluk ba kontentór 200 resin hosi Singapura

Nia dehan, ajénsia estivadór sira sai vítima tanba Governu la envolve ona iha Portu Tibar tanba iha ekipamentu kompletu no modernu liu kompara ho ekipamentu iha Portu Dili

“Entaun ida-ne’e hamate empreza estivadór hotu, loloos ne’e antes halo deskargamentu iha Portu Tibar, Governu tenke fó ona solusaun ka esklaresimentu ruma kona-ba pozisaun empreza estivadór sira ne’ebé durante servisu iha Portu Dili nian ba oin atu hanesan ne’ebé,” nia akresenta.

Nia refere ba polítika Governu ne’ebé hateten, empreza sira sei sai parseiru hodi dezenvolve rai-laran, tanba ne’e Governu tenke iha kompromisu hodi fó dalan alternativa.

“Agora deskargamentu iha hotu Portu Tibar, Governu atu tau ami iha ne’ebé, ami la halo buat ida ona ne’e fó impaktu boot tebes ba ami,” nia tenik.

Antes ne’e, ajénsia estivadór sira hato’o ona pedidu no hasoru malu ona ho Vise-Ministru Finansa maibé seidauk iha solusaun.

“Ami kontinua halo pedidu ba Primeiru-Ministru hodi husu ami-nia pozisaun ba oin ne’e hanusa, maibé Primeiru-Ministru fó resposta ba ami haruka ba hasoru Ministériu Transporte no Komunikasaun (MTK), ba oin ami esforsu nune’e bele hetan resposta hosi Governu,” Constâncio Guterres haktuir.

Ajénsia estivadór ne’e nu’udar ajénsia lima, kompostu hosi rua (Ajénsia Ariana no ex Tis/Huan) durante ne’e halo atividade deskargamentu merkadoria iha kontetór no tolu (Ajénsia Bikeli, Marrítima no Bethoben) ba kargu iha Portu Dili.

“Ida-ne’e ita fó servisu ba traballadór timor-oan hamutuk 700 resin no agora Governu la fó solusaun, la’ós fó impaktu de’it ba ami maibé ba traballadór sira hotu,” nia salienta.

Jornalista    : Arminda Fonseca

Editora         : Julia Chatarina

iklan
iklan

Leave a Reply

iklan
error: Content is protected !!