HEADLINE, KAPITÁL, NASIONÁL

MTKI atualiza preparasaun Timor-Leste tama ASEAN ba PM Cambódia

MTKI atualiza preparasaun Timor-Leste tama ASEAN ba PM Cambódia

Ministru Turizmu Komérsiu no Indústria, José Lucas do Carmo da Silva. Imajen Tatoli/Francisco Sony

DILI, 20 setembru 2022 (TATOLI)–Ministru Turizmu Komérsiu no Indústria (MTKI), José Lucas do Carmo da Silva, foin lalais hala’o vizita traballu ba Cambódia hodi partisipa iha enkontru Ministru Ekonomia ba Asosiasaun Nasaun Sudeste Aziátiku (ASEAN, sigla inglés).

Iha ámbitu ne’e, Ministru José Lucas atualiza mós preparasaun Timor-Leste nian adere ba ASEAN ba Primeiru-Ministru (PM) Cambódia, Hun Sen no Ministru Ekonomia sira hosi país seluk.

“Sira (Cambódia) reafirma dala-ida tan liuhosi sira-nia Primeiru-Ministru katak sei halo esforsu tomak atu iha tinan ne’e nia rohan bele anúnsia Timor-Leste tama ba ASEAN. Aleinde ne’e durante partisipasaun MTKI nian iha Cambódia hala’o mós enkontru bilaterál ho xefe delegasaun sira ho nasaun sira seluk, ne’ebé hetan reasaun pozitivu tebes hosi Ministru Ekonomia hosi nasaun sira hotu,” Ministru hateten bainhira relata rezultadu vizita ba Primeiru-Ministru, Taur Matan Ruak, iha Rezidénsia Farol, tersa ne’e.

Notísia relevante: Timor-Leste sai membru ASEAN ofisialmente iha tinan 2023

Iha biban hanesan, governante ne’e hato’o ba delegasaun sira katak hafoin ekipa Fact-Finding Mission mai vizita Timor-Leste, hosi ida-ne’e Governu foti kedas medida balun ne’ebé hatudu katak Timór iha kompromisu boot atu adere ba asosiasaun, tanba ne’e liuhosi Konsellu Ministru aloka kedas fundu atu halo rekrutamentu ba profisionál sira ne’ebé sei hola parte iha sekretariadu preparasaun ASEAN nian.

Konsellu Ministru mós sei aprova pakote lejizlativu sira ne’ebé asosia ho integrasaun ASEAN nian no daudaun mós iha estabelesimentu ekipa traballu.

“Ha’u mai hasoru Primeiru-Ministru atu atualiza vizita MTKI nian foin lalais iha Cambódia hodi partisipa iha enkontru Ministru Ekonomia ASEAN nian ne’ebé Timor-Leste foin dahuluk hetan konvite espesiál hosi Prezidénsia komisaun ne’e,” nia tenik.

Aleinde ne’e, informa mós katak iha eventu internasionál ne’e hasoru mós Primeiru-Ministru Cambódia, Hun Sen no hato’o katak Governu ho povu Cambódia durante ne’e mós halo esforsu atu apoia Timor-Leste adere ba asosiasaun tanba daudaun ne’e sira mak lidera prezidénsia ASEAN.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!