DILI, 20 setembru 2022 (TATOLI)–Reprezentante Nasionál Programa Dezenvolvimentu Nasaun Unidu (UNDP, sigla inglés), Munkhtuya Altangerel, hasoru malu ho Primeiru-Ministru (PM), Taur Matan Ruak, hodi ko’alia kona-ba redusaun má-nutrisaun iha Timor-Leste.
“Primeiru-Ministru husu UNDP apoiu importante liu mak haree liu oinsá redús kiak no má-nutrisaun. UNDP simu pedidu ne’e no promete ba oin sei serbisu hamutuk atu foku ba ida-ne’e,” Munkhtuya Altangerel, relata, hafoin hasoru malu ho Primeiru-Ministru iha Rezidénsia Farol, tersa ne’e.
Notísia relevante: PR destaka seriedade rezolve má-nutrisaun ba labarik
UNDP daudaun serbisu hamutuk ho komunidade atu hasae produtu lokál, liuliu produsaun foos, hanesan projetu UNDP iha Rejiaun Administrativa Oé-cusse-Ambeno (RAEOA) halo produsaun foos membramo.
Biban hanesan, Reprezentante Nasionál UNDP informa mós Xefe Governu kona-ba vizita Asistente Sektretáriu Jenerál UN no Prezidente UNDP Asia Pasífiku, Kanni Wignaraja mai Timor-Leste, iha loron 17 outubru 2022, durante loron-haat.
“Vizita ne’e ho objetivu atu hasoru Governu no komunidade ne’ebé benefisia projetu UNDP nian,” nia tenik.
Jornalista : Antónia Gusmão
Editora : Julia Chatarina
