DILI, 21 setembru 2022 (TATOLI)-Vise Primeiru-Ministru Santa Sé ne’ebé substitui hosi Sekretária Estadu, Arsebispu Edgar Peña Parra, konsidera Timor-Leste ne’e iha futuru tanba país joven ho kardeál ne’ebé sei foun, no Timor-Leste ne’e riku tanba joven barak mak partisipa no hili dalan tuir vokasaun saserdotál.
Notísia Relevante: Horta-Peña Parra inaugura edifísiu embaixada Santa Sé iha Timor-Leste
“País ida-ne’e, Timor-Leste, iha futuru tanba país ne’e joven, kardeál ne’ebé sei foun, irmán no saserdote sira sei joven. Ne’eduni, país ne’e riku tanba mezmu sira-ne’ebé saserdote sira tuan, maibé jerasaun foun mai nafatin. Tanba ne’e, tenke hanoin nafatin katak irmán, bispu, saserdote tenke nafatin iha fuan. Tanba, nasaun sira barak, kuaze mate ka iha agunia laran. Ha’u bele dehan, nasaun sira-ne’ebé riku tebes maibé sira iha agunia laran. Ezemplu joven hira mak hili vokasaun saserdotál no joven hira mak tama semináriu, laiha. Maibé, Timor-Leste iha rikeza ne’ebé boot tanba joven barak mak partisipa ba vokasaun saserdotál, ne’ebé hanesan joven Timor tenke iha korajen,” Arsebispu Edgar Peña Parra hateten liuhosi diskursu, bainhira hala’o vizita ba Sentru Asisténsia Labarik Ki’ak, iha kongregasaun Irmãs Canossiana Balíde, Díli, kuarta ne’e.
Vise Primeiru-Ministru Santa Sé ne’e husu ba irmãn no ba ema hotu atu tau atensaun ba vokasaun saserdotál tanba futuru igreja mai hosi vokasaun sira.
“Tanba, ha’u lembra ba Amu Papa Francisco dehan kriasaun igreja mai hosi evanjelizasaun no mós alegria igreja mai hosi vokasaun. Entaun, igreja moris mak hanesan rikeza ida, la’ós fali poder no ida-ne’ebé mak servisu ida ita halo ne’e. Entaun, ha’u promote, ha’u sei reza loro-loron ba saserdote hotu, ita-nia bispu sira no irmán sira-ne’ebé servisu iha Timor-Leste,” nia dehan.
Madre Guilhermina Martçal hateten, vizita ida hanesan Representante Santa Sé mai haree realidade moris igreja Timor-Leste nian, saida mak Timor-Leste halo no saida mak presiza hadi’a no saida mak presiza halo di’ak tan iha futuru, hodi servi povu ida-ne’ebé di’akliu.
“Reprezentante vatikanu mai haree ho matan no kaer ho liman saida mak igreja lokál halo no saida mak sarani sira halo ba futuru. Tanba, ita haree ohin representante Santa Sé apresia loos povu Timor-Leste nia fiar no nia selebrasaun hanesan igreja ne’ebé moris iha mundu globál ida ohin nian. Ne’ebé, ita haree katak buat ida-ne’ebé furak loos oinsá mak ita iha kontinuadade ba misaun ida loron aban, ema haree ida ohin no aban oinsá,” nia dehan.
Ida-ne’e, nia dehan, fó enfáze ida ba hotu-hotu nu’udar relijiozu ba padre, madre, katekista no leigus hotu-hotu oinsá mak atu hadi’a servisu ne’ebé di’ak liután hodi servisu ba ema sira-ne’ebé presiza loos relijiozu no relijioza sira-nia tulun iha loron ohin.
Tanba ne’e, nia hato’o mensajen katak relijioza sira la to’o de’it atu halo selebrasaun hanesan ida ne’e maibé oinsá mak hosi parte relijioza, madre no padre sira atu servisu makaas hodi fó formasaun ne’ebé adekuada no akonpaña ba labarik, foinsa’e no inan-aman sira atu bele iha mudansa ba moris ida-ne’ebé integrada liu ho dignidade no hatudu an duni katak povu Timor-Leste 98% katóliku la’ós iha persentajen de’it.
Maibé, liu-liu persentajen sarani nia moris loro-loron ba ema ida-idak ninia komportamentu mak tenke hatudu duni katak timoroan ne’e ema sarani iha ne’ebé de’it.
“Tanba ne’e, ba ha’u pesoálmente haksolok bainhira povu Timor-Leste moris hakmatek no haksolok bainhira ba hasoru ema ki’ak no joven sira iha fatin-fatin, ida-ne’e ba ha’u katak previleiju ida. Tanba, ba ha’u hanesan pesoál hanesan kongregasaun la to’o de’it ba ema akademiku maibé liu-liu ita tama iha fatin sira ne’ebé ema la ba, hanesan labarik feto no labarik mane sira-ne’ebé ki’ak, tanba joven sira barak mak presiza hela atensaun hosi padre, madre no ita hotu,” nia hateten.
Entretantu, iha atividade Vise Primeiru-Ministru Santa Sé ne’ebé substitui hosi Sekretária Estadu, Arsebispu Edgar Peña Parra halo vizita ba Sentru Asisténsia Labarik Ki’ak, hosi Irmãs Canossiana Balide, Dili, ne’e akonpañadu hosi Dom Virgilio Kardeál Do Carmo da Silva, Núnsiu Apostólika Rezidente iha Malazia no Enkarregadu Negósiu Rezidente iha Timor-Leste, Reprezentante Santa Sé iha Timor-Leste.
Enkuantu, partisipasaun ba vizita ne’e irmán sira hosi komunidade tolu mak hanesan komunidade Alma, komunidade Dominicana, komunidade Filhas de Maria Auxiliadora ka madre salesiana no padre sira.
Jornalista : Nelia Fernandes
Editór : Cancio Ximenes
