iklan

NASIONÁL, INTERNASIONÁL, HEADLINE, POLÍTIKA

Horta-Peña Parra inaugura edifísiu embaixada Santa Sé iha Timor-Leste

Horta-Peña Parra inaugura edifísiu embaixada Santa Sé iha Timor-Leste

Prezidente Repúblika (PR), José Ramos Horta, ho Vise Primeiru-Ministru Santa Sé ne’ebé substitui hosi Sekretária Estadu, Arsebispu Edgar Peña Parra, ofisialmente asina plaka inaugurasaun ba edífísiu Nunsiátura Apostólika ka embaixada Santa Sé nian iha Motael, Dili, Timor-Leste, tersa (20/09). Imajen Tatoli/António Daciparu.

DILI, 20 setembru 2022 (TATOLI)—Prezidente Repúblika (PR), José Ramos Horta, ho Vise Primeiru-Ministru Santa Sé ne’ebé substitui hosi Sekretária Estadu, Arsebispu Edgar Peña Parra, tersa ne’e, inaugura edifísiu Nunsiátura Apostólika ka embaixada Santa Sé nian iha Motael, Dili, Timor-Leste.

Notísia Relevante: PR Horta-Vise PM Santa Sé lansa Sentru Fraternidade Umana Timor-Leste

Xefe Estadu ho Vise PM Santa Sé ne’e ofisialmente asina mós plaka inaugurasaun ba edífísiu foun ne’e nu’udar faktu istóriku, no komemora mós relasaun diplomátika Timor-Leste ho Santa Sé durante tinan 20-resin ona.

Prezidente repúblika, José Ramos Horta bainhira ho Vise Primeiru-ministru Santa Sé, Arsebispu Edgar Peña Parra, partisipa iha semináriu iha UCT Balide, tersa 20 setembru 2022. Imajen Tatoli/António Daciparu

“Ne’e di’ak tebe-tebes aliened edifísiu furak loos enrikese Timor nia paijazen arkitetónika. Ita-nia relasaun ho Santa Sé kontinua sempre uluk kedas antes restaurasaun indepe,dénsia kedas. Amu Papa João Paulo II mai iha ne’e (Timor-Leste), Kardeál boot ida Franses naran Roger mai iha ne’e no Amu Bispu Belo, eis falesidu Dom Martinho Lopes ba iha Vatikanu Roma, Amu Papa João Paul II simu sira. Purtantu relasaun ho Santa Sé sempre forte no kle’an iha tinan 20-resin nia laran,” Prezidente Repúblika, José Ramos Horta, hateten ba jornalista sira iha serimónia inaugurasaun Embaixada Santa Sé iha Motael.

Xefe Estadu ne’e hatutan, ho inaugurasaun edifísiu foun ne’e hanesan primeira-vés iha tinan 500 nia laran Timor-Leste hetan Kardeál, klaru notísia boot kuandu simu informasaun Amu Papa nomea ita-nia Arsebispu Dom Virgílio ba Kardeál.

“Klaru tinan rua nia laran sira prepara daudaun Nunsiatura no to’o agora laiha Núnsiu no agora Marco Prizi hanesan enkaregadu negósiu maibé iha tempu badak sei nomea karik Núnsiu ida hanesan embaixadór Vatikanu Santa Sé nian,” nia hateten.

Vise Primieru-Ministru Santa Sé, Arsebispu Edgar Peña Parra, hakarak transmite prezente no proximidade esperituál hosi Sua Santidade Papa Francisco rekorda fila-fali partikulár inspiradora hodi hanoin hikas vizita Sáo João Paulo II iha tinan 1989 mai iha nasaun ne’e.

Ho ida ne’e, Santu Padre espera Nunsiátura Apostólika foun ida-ne’e sei servi sinál konkretu solisitude no kuidadu sertamente ho domin sempre demonstra hosi povu Timor-Leste.

“Onra boot mai ha’u, portantu mai ho lian hotu-hotu di’ak ba misaun diplomátika foun no uma foun ida-ne’e hosi Papa atu servi apoiu reprezenta pontefísiu dezempeña nia misaun iha Timor-Leste, hamutuk laiha dúvida igreja lokál ne’ebé prezente,” nia hateten.

Enkuantu, edifísiu foun Nunsiátura Apostólika ne’e lokaliza iha Motael konstrui ho andar rua, ninia paizajen arkitetónika furak tebes ne’ebé kompleta ho fasilidade, hodi bele hala’o misaun diplomátika Santa Sé nian iha Timor-Leste.

Entertantu, partisipa iha serimónia inaugurasaun no komemorasaun relasaun diplomátika marka prezensa hosi Prezidente Parlamentu Nasionál, Aniceto Longuinhos Guterres Lopes, Prezidente Tribunál Rekursu, Deolindo dos Santos, Reprezenta Primeiru-Ministru atuál Ministru Prezidensia Konsellu Ministru, Fidelis Manuel Leite Mangalhães, membru VIII Governu Konstitusionál, korpu diplomátiku, padre-madre no konvidadu sira seluk.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!