iklan

EKONOMIA, HEADLINE

Hahú 30 setembru, ró tula kontentór la atraka iha Portu Dili

Hahú 30 setembru, ró tula kontentór la atraka iha Portu Dili

Komisáriu AA/Alfándega, José António Fátima Abílio. Imajen Tatoli/Egas Cristóvão

DILI, 21 setembru 2022 (TATOLI)—Komisáriu Autoridade Aduaneira (AA)/Alfándega, José António Fátima Abílio, hateten, hahú loron 30 setembru tinan ne’e, ró tula kontentór la atraka ona iha Portu Dili hanesan baibain.

“Ita realiza enkontru interministeriál iha semana kotuk no deside ita sei halo go live ba portu Tibar iha loron 30 setembru agora, signifika hahú loron ne’e kedas ró la atraka ona iha Portu Dili,” Komisáriu hateten ba Agência Tatoli, iha ninia knaar fatin, Palásiu Governu, kuarta ne’e.

Nia dehan, maski ró kontentór la atraka ona iha Portu Dili maibé ekipa Alfándega balun sei kontinua halo atividade iha Portu Dili hodi kontinua halo koerénsia ka liberta prosesu kontentór sira ne’ebé iha to’o hotu, tanba kontentór foun ne’ebé tama sei konsentra hotu ona iha Portu Tibar.

Lansamentu operasionál Portu Tibar sei hahú iha loron 30 setembru no 30 novembru mak sei halo lansamentu ofisiál.

Preparasaun antes halo lansamentu maka iha semana kotuk halo ona deskarregamentu dahuluk ba kontentór 200 resin hodi koko ekipamentu ne’ebé empreza Bolloré monta ona.

“Seluk mak daudaun ne’e esforsu hela ba preparasaun ligasaun internet, eletrisidade, no sistema sira seluk. Hein katak sira konklui ona ligasaun internet iha ne’ebá nune’e bele halo instalasaun sistema Asycuda atu fasilita prosesu klerénsia no prosesu seluk tuir mai,” nia tenik.

Notísia relevante: Portu Tibar halo deskarregamentu dahuluk ba kontentór 200 resin hosi Singapura

Aleinde ne’e, konstrusaun ba edifísiu prontu ona no prienxe ona kritériu maibé falta de’it mak hatama ekipamentu ligasaun internet.

“Agora esforsu hela antes halo lansamentu buat hotu prepara ona, ne’ebé preparasaun ne’e sei kontinua la’o nafatin no ekipa idaidak halo esforsu,” Komisáru Alfándega relata.

Bainhira atividade Portu Tibar la’o normál, Alfándega hala’o ninia knaar iha ne’ebá tanba bazeia planu konstrusaun Portu Tibar, Alfándega integra hotu iha Projetu Públiku Privadu (PPP), diferensa ho servisu Alfándega iha Portu Dili, iha Portu Tibar hanesan área empreza Bolloré atu kontrola parte deskarregamentu kontentór maibé parte seluk mós kontrola hosi Governu.

“Taxa ne’ebé Bolloré rekolla liuhosi atividade deskarregamentu kontentór sira sei fahe fali balun ba Estadu Timór no ba sira rasik hodi rekupera orsamentu ne’ebé halo ona investimentu, maibé kona-ba taxa impostu nafatin rekolla direitamente hosi Alfándega,” nia esplika.

Iha loron 30 agostu 2018, Primeiru-Ministru, Taur Matan Ruak, halo lansamentu konstrusaun Portu Tibar no tuir planu finaliza konstrusaun iha maiu 2022, maibé tanba situasaun pandemia halo prosesu la’o neneik.

Portu Tibar lokaliza iha kilómetru 10 hosi Oeste Dili, iha Baía Tibar, munísipiu Liquiçá, ne’ebé hanesan infraestutura prioritária ne’ebé indetifika ona iha Planu Estratéjiku Dezenvolvimentu Nasionál (PEDN) 2011-2030.

Projetu ne’e hanesan konstrusaun nível internasionál, ne’ebé ezekuta liuhosi Timor-Port S.A ho modalidade PPP, ne’ebé halo konsórsiu ho Bolloré no Governu Timor-Leste.

Governu aloka millaun $130 ba konstrusaun ne’e, enkuantu Timor Port no Bolloré hamutuk millaun $150, ho totál millaun $280 ba faze inísiu.

Enkuantu, totál investimentu orsamentu ba Portu Tibar to’o tinan 30 ho valór millaun $500.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!