iklan

EDUKASAUN, HEADLINE

MEJD distribui karteira eskolár 1.565 ba eskola 20 iha munisípiu tolu

MEJD distribui karteira eskolár 1.565 ba eskola 20 iha munisípiu tolu

Ilustrasaun karteira eskolár. Imajen/Espesiál

DILI, 21 setembru 2022 (TATOLI)–Ministériu Edukasaun Juventude no Desportu (MEJD) liuhosi Diresaun Nasionál Patrimóniu Lojístika no Teknolojia (DNPLT) distribui tan karteira eskolár (meza no kadeira) unidade 1.565 ba eskola ensinu báziku no ensinu sekundáriu tékniku vokasionál hamutuk 20 iha munisípiu Bobonaro, Ainaro no Ermera.

Tuir Diretór Nasionál Patrimóniu Lojístika no Teknolojia, Pedro Pinto dos Reis, karteira eskolár sira ne’ebé hahú distribui ba eskola sira iha territóriu nasionál ne’e foun, ne’ebé prodús iha tinan 2021 ho kuantidade unidade 20.000.

“Karteira eskolár 1.565 ne’ebé distribui tan ba eskola 20 iha munisípiu tolu kompostu hosi munisípiu Bobonaro unidade 1.095, munisípiu Ainaro unidade 320 no munisípiu Ermera unidade 150. Enkuantu, hosi munisípiu Bobonaro rasik ninia distribuisaun hala’o tuir etapa, ne’ebé hosi etapa dahuluk hahú iha loron 09 setembru 2022 ba eskola ensinu báziku lima,” Diretór informa iha ninia knaar fatin, Vila-Verde, kuarta ne’e.

Notísia relevante: MEJD identifika karteira eskolár iha Ainaro no Manufahi sufisiente

Eskola lima ne’ebé hetan uluk distribuisaun karteira eskolár ne’e mak hanesan Eskola Ensinu Báziku Filiál (EBF) Di-lai ho unidade 60, EBF Majop unidade 60, EBF Opai vila unidade 60, EBF Odelgomo unidade 60, no EBF Ana-pal unidade 75.

Diretór haktuir, parte diresaun halo esforsu atu distribui lalais atu nune’e molok udan monu rai eskola sira ne’ebé tama iha risku inundasaun, hetan hotu ona karteira eskolár.

“Tanba ne’e, distribuisaun ne’e halo daudaun no foku uluk ba eskola sira ne’ebé iha area remota. Hafoin finaliza hotu ona maka foin tama ba eskola sira ne’ebé iha área seguru. Hosi munisípiu Dili nian hetan ona distribuisaun antes ba eskola 16 ho totál karteira eskolár unidade 540,” nia akresenta.

Distribuisaun etapa daruak ba munisípiu Bobonaro hahú iha loron 12 setembru 2022 ba eskola neen hanesan Eskola Ensinu Báziku Sentrál (EBC, sigla portugés) Hau-ba unidade 75, EBF kota boot unidade 75, EBF Molop unidade 75, EBF 12 abril unidade 120, EBF Mau-ubu unidade 45 unidade, no EBF Karabu unidade 60.

Nune’e mós, ba etapa datoluk, DNPLT kontinua halo distribuisaun ba eskola haat iha munisípiu Bobonaro hahú iha loron 15 setembru 2022 ba eskola EBF Ferik katuas unidade 75, EBF Moloi unidade 60, EBF Oblekul unidade 75, no EBF Halihun unidade 120.

Ba munisípiu Ainaro no Ermera, distribuisaun halo loron ida de’it, hahú iha loron 19 setembru 2022, munisípiu Ainaro distribui ba Eskola EB Tara bulak Turiskai unidade 40, EBF Lesu-ata unidade 40, Eskola Ensinu Sekundáriu Tékniku Vokasionál (ESTV) Mau-Lau unidade 120, ESTV Gil Oan Soru unidade 120 no ba munisípiu Ermera distribuisaun ba eskola ida de’it ba Eskola EBF Mala-bee unidade 150.

Jornalista   : Tomé Amado  

Editora        : Julia Chatarina  

iklan
iklan

Leave a Reply

iklan
error: Content is protected !!