iklan

NASIONÁL, EDUKASAUN

Promove fraternidade umana ba foinsa’e sira moris fraternu no solidáriu

Promove fraternidade umana ba foinsa’e sira moris fraternu no solidáriu

Reitór UCT São João Paulo II, Joel Casimiro Pinto. Imajen TATOLI/Egas Cristóvão

DILI, 21 setembru 2022 (TATOLI)-Reitór Universidade Katólika Timorense (UCT, sigla portugés) São João Paulo II, Pe. Joel Casimiro Pinto, OFM, hateten UCT realiza simpóziu akadémiku kona-ba deklarasaun Abu Dabhi dokumentu fraternidade umana hodi promove ba estudante no foinsa’e sira atu moris iha fraternu, amigavel no solidáriu iha sosiedade nia leet.

Notísia Relevante: Fraternidade umana promove diálogu sai instrumentu relevante ba ohin loron

“Eventu simpóziu ne’e promove dokumentu Abhu Dabhi, fraternidade umana kona-ba moris konvivénsia komun nian, hodi hamosu iha foinsa’e sira-nia fuan no neon. Katak, presiza haree moris ida fraternu, moris ida amigavel, moris ida solidáriu ho ema hotu no moris ho kriatura tomak. Tanba, São Francisco de Asis mak sai inspiradór ba dokumentu ida-ne’e, tanba São Francisco de Asis hasoru sultan ida ho naran, Malik Alcamil iha rai Damieta iha Eziptu. Ida-ne’e ho espíritu ida lori dame ba malu, duke ita funu no iha konflitu, entaun di’akliu ita moris iha dame,” Pe. Joel Casimiro Pinto, OFM, hateten ba Agência Tatoli iha simpóziu, iha Salaun Universidade Katólika Timorense (UCT), Balide, tersa ne’e.

Ho dokumentu fraternidade umana kona-ba pás mundiál ko konvivénsia komun ne’ebé asina hosi Papa Francisco ho Saserdote Musulmanu Al-Azhar, Ahmad Al-Tayyeb, ne’e hakarak asegura katak la’ós ona tempu atu “Si Vis Pacem, Para Bellun” (se ó hakarak dame, prepara an hasoru funu), ida-ne’e labale no la presiza ona iha tempu ohin loron.

“Agora ne’e, ema presiza esforsu ba dame no moris hamutuk iha fraternidade, amizade no solidaridade nia laran,” nia dehan.

Maske nune’e, iha UCT koko kuda no transmite fraternidade umana ne’e ba estudante sira, tanba UCT ne’e nia objetivu ida mak la’ós de’it síénsia maibé forma sira atu sai ema ne’ebé hadomi ema seluk, hadomi nia an rasik no ema-ne’ebé hadomi mós kriatura tomak.

“Ha’u dehan ona ba sira, hamosu problema iha ne’e, ó-nia fatin la’ós iha ne’e no ó ba iha ne’ebá no ó mós la’ós Katólika. Tanba, sé mak dehan nia an Katólika, nia ne’e hatene hadomi ema no sé mak la hadomi ema, signifika nia la’ós Katólika,” nia esplika.

Tuir nia, iha UCT seidauk mosu violénsia tanba nia parte hatene katak estudante iha UCT ne’e mesak ema matenek, hodi matenek kontrola sira-nia an no sira-nia kakutak atu labele error no kontrola mós sira-nia emosaun atu bele jere sira-nia an ho di’ak no relasaun di’ak ho ema seluk.

Senadu Estudantil UCT, Lucia de Jesus, hateten atividade simpoziu ne’e istóriku ba Timor-Leste tanba hatene katak Timor foin hakat ba pasu prosesu dezenvolvimentu nia laran, maibé iha mós progresu barak liuhosi moris iha sustentabilidade.

“Tanba, ohin ita-nia bainaka sira hateten katak moris iha sustentabilidade nia laran presiza moris mós iha dame, fraternidade umanu no simu malu hanesan maun-alin iha kualker saida de’it, inklui ema hotu iha prosesu dezenvolvimentu nia laran. Entaun, hanesan estudante ha’u sente ida ne’e hanesan pontu istóriku ba estudante no juventude hotu atu haree ba ida-ne’e, liu-liu oinsá bele uza istória ida-ne’e atu bele aprende no hatene buat hirak ne’e hodi kontribui ba prosesu dezenvolvimentu Timor nian,” nia dehan.

Tanba ne’e, hanesan estudante materia ne’ebé ohin hetan ba oin atu moris iha diversidade entre diferensa rejiliaun no direferensa ekonomia iha sosiedade nia laran.

“Maibé, buat ne’e ita presiza atu halo mak presiza simu malu no inklui ema hotu iha prosesu saida de’it. Entaun, hosi ne’e ha’u espera katak ita-nia sosiedade, liu-liu iha Timor-Leste nia laran, ha’u espera katak ita sei iha nível ida-ne’ebé mak ema hotu sei loke sira-nia hanoin atu bele simu malu nu’udar umanu, liu-liu simu malu la’ós haree ba sira-nia rasa no ekonomia, maibé sira mós pertense hosi Maromak nia kriatura,” nia dehan.

Notísia Relevante: Vise PM Santa Sé: Timor-Leste nasaun dahuluk proklama fraternidade umana

Jornalista : Nelia Fernandes

Editór         : Cancio Ximenes

iklan
iklan

Leave a Reply

iklan
error: Content is protected !!