iklan

MUNISÍPIU, OÉ-CUSSE (RAEOA), POLÍTIKA

RAEOA sei hasa’e koñesimentu xefe suku liuhosi estudu komparativu iha NTT

RAEOA sei hasa’e koñesimentu xefe suku liuhosi estudu komparativu iha NTT

Prezidente sesante interinu RAEOA-ZEESMS, Arsénio Paixão Bano. Imajen Tatoli/Egas Cristovão.

OÉ-CUSSE, 21 setembru 2022 (TATOLI)–Autoridade Rejiaun Administrativa Espesiál Oé-Cusse Ambeno (RAEOA), lideradu Arsenio Paixão, sei dezloka autoridade komunitária sira hosi suku 10 atu halo estudu komparativu iha Nusa Tenggara Timur (NTT), hodi hasa’e koñesimentu atu dezenvolve suku liuhosi Programa Suku Amasat.

“Iha tinan ne’e fulan-outubru nia laran, ita sei haruka xefe suku sira sei ba halo estudu komparativu iha NTT, kabupaten Belu no TTU, xefe suku 10 mak sei ba, tanba Oé-Cusse ita hahú ona ho Programa Suku Amasat,” Prezidente Autoridade RAEOA, Arsénio Paixão Bano ko’alia iha Oé-Cusse, tersa ne’e.

Nia afirma, Programa Suku Amasat ne’e, xefe suku sira tenke aumenta koñesimentu halo jestaun ba prosesu dezenvolvimentu liga ho finanseira suku atu hadi’a no dezenvolve suku hanesan produtu prioridade suku rasik.

“Tan ne’e programa ne’e atu lori sira bá, atu hatene mobiliza suku ne’e oinsá, atu kuidadu ambiente labele tesi ai arbiru, dezenvolve produtu prioridade iha suku ne’e oinsá, tanba Oé-Cusse sei menus modo, maioria importasaun, maske rai bee-moos no ema iha, entaun ita tenke buka dalan aprende atu hamenus buat sira-ne’e, kuida modo halo barak no prodús manu-tolun barak oinsá, ida-ne’e objetivu loloos,” nia afirma.

Tuir Autoridade ne’e nia observasaun katak, nia parte halo ona observasaun ba kada suku sira iha territóriu Oé-Cusse.

Nia fó ezemplu, hanesan iha sub-rejiaun Pante Makasar, suku Nipani, produtu prioridade iha suku ne’e maka ikan, nune’e polítika ba futuru bele aumenta tán boek no kadiuk, tanba agrikultór sira iha suku Nipani iha inisiativa haki’ak ho espésie sufisiente ona.

Nune’e mós komunidade iha suku Nipani, sira bele oferese fatin turizmu, no bele oferese fasilidade desportiva di’ak, atu promove talentu desportivu ho polítika bele konvida komunidade hosi Wini bele realiza jogu amizade hanesan lasu ida hodi hametin relasaun iha liña fronteira.

“Tán ne’e maka Programa Suku Amasat ne’e, xefe suku sira ita hakarak sira ba haree, labele Prezidente ho Sekretáriu Rejionál sira de’it mak bá, grupu sira mós sei ba, atu ita iha rai enklave ne’e labele izola-aan, maibé ita tenke kontinua aprende hosi ema seluk, ita la presiza ba eskola tán tanba ita-nia ema balu katuas, ita tenke ba ho otas ne’ebé iha, aprende mai implementa dudu nafatin oan sira buka dalan,” nia katak.

Notísia relevante: Prezidente Autoridade RAEOA despede ho ekipa delegasaun dezloka ba Kefamenanu

Jornalista      : Abílio Elo Nini

Editór              : Evaristo Soares Martins

iklan
iklan

Leave a Reply

iklan
error: Content is protected !!