DILI, 21 setembru 2022 (TATOLI)—Diretór Diresaun Nasionál Empregu Exteriór (DNEE) hosi Sekretaria Estadu Formasaun Profisionál no Empregu, Filomeno Soares, hateten, traballadór timor-oan ne’ebé bá serbisu iha Koreia Súl no Austrália konsege kontribui reseita millaun $78 ba kofre Estadu, hahú tinan 2009 to’o agora.
“Liuhosi programa mobilidade laborál bele fó oportunidade ba timor-oan serbisu iha Koreia Súl no Austrália to’o agora konsege hatama reseita hamutuk millaun $78 ba kofre Estadu,”Filomeno Soares, hateten, iha Caicoli, Dili, kuarta ne’e.
Notísia relevante: Traballadór timor-oan 100 iha Austrália tama ona sistema
Reseita ne’ebé hetan maihosi traballadór timor-oan hamutuk 4.000 resin iha Koreia Súl kontribui millaun $43 no traballadór timor-oan hamutuk 3.700 resin iha iha Austrália kontribui millaun $35.
“Ha’u-nia esperansa ba traballdór timor-oan sira bele hetan oportunidade barak, ita-boot sira tenke prepara imi-nia an didi’ak nune’e bele aproveita oportunidade sira hodi redús problema sosiál ne’ebé iha ita-nia rai,” nia akresenta.
Jornalista : Arminda Fonseca
Editora : Julia Chatarina
