iklan

HEADLINE, MUNISÍPIU, VIQUEQUE

Estudante 160 hosi Eskola EBC 07 Uatulari preparadu partisipa ezame nasionál

Estudante 160 hosi Eskola EBC 07 Uatulari preparadu partisipa ezame nasionál

Adjutu Diretór Eskola EBC 07 Uatulari no Profesór, Paulo Hornai, hanorin hela estudante Eskola EBC 07 Uatulari, iha suku Matahoi, kinta (22/09). Imajen Tatoli/Vitorino Lopes da Costa

VIQUEQUE, 22 setembru 2022 (TATOLI)—Estudante finalista na’in-160 hosi Ensinu Báziku Sentral (EBC, sigla portugés) 07, iha suku Matahoi, postu administrativu Uatulari, munisípiu Viqueque, daudaun ne’e preparadu partisipa ezame nasionál iha fulan-outubru.

“Ami-nia estudante preparadu partisipa ezame nasionál no ami fó ona valór 50% ba ezame períodu dahuluk no dahuluk no rekapitula ona iha estudante klase 3 nia kaderneta. Nune’e, agora ami kontinua hanorin matéria lima ba ezame nasionál,” Adjutu Diretór Eskola EBC 07 Uatulari no Profesór, Paulo Hornai, hateten iha suku Matahoi, kinta ne’e.

Notísia relevante: Servisu Edukasaun Viqueque rejista kandidatu finalista ezame nasionál na’in-3.296

Matéria lima ne’ebé sei tama iha ezame nasionál maka hanesan matemátika, fízika, biolojia, lian inglés no lian portugés.

“Ami agora hanorin hela matéria sira ba estudante sira, maski daudaun ne’e tempu limitadu, maibé ami kontinua esforsu hodi halo revizaun matéria iha aula prezensiál,” nia akresenta.

Nia dehan, estudante balun naran la loos maibé profesór sira haruka ona lista ba nasionál, hafoin estudante sira liu ezame nasionál mak foin bele hadi’a hodi tau loloos iha diploma.

“Ami daudaun sei prosesa hela naran estudante, ne’ebé tuir ka la’e seidauk hatene loloos. Ita sei haree iha ezame,” nia tenik.

Ministériu Edukasaun Juventude no Desportu (MEJD) antes ne’e fó sai ona kalendáriu ezame nasionál, ne’ebé sei realiza iha loron 24 outubru 2022.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!