DILI, 22 setembru 2022 (TATOLI)-Komunidade Marconi, Domingos Simão, husu ba Ministériu Justisa (MJ) atu buka solusaun ba disputa rai iha área Marconi klínika 333 nia oin Praia dos Coqueros, aldeia 04, suku Fatuhada, postu administrativu Dom Aleixo.
“Husu ba Ministériu Justisa, se bele tempu badak sobu lalais lutu ne’ebé individu balun halo haleu iha rai pedasuk ida iha área Marconi klínika 333 nia oin”, Simão ba jornalista sira liuhosi konferénsia imprensa ne’ebé hala’o iha kinta ne’e.
Nia dehan, hanesan komunidade Marconi lamenta, tanba ema balun mai aprezenta sertifikadu hodi reklama nain ba rai. “Rai ne’e estatutu loos hela, desde tempu Portugés no Indonézia rai ne’e la pertense ba ema, maibé ba domíniu públiku”, Simão tenik. Abitante ne’e reprezenta komunidade husu ba MJ kuandu hetan ona solusaun ba rai ne’e, bele transforma fatin sai jardin.
Notísia relevante: MJ-PNTL sei hapara atividade konstrusaun iha rai Estadu área Marconi
Kordenadór Nasionál Rede ba Rai, Pedrito Viera, hateten rede ba rai kontinua hamutuk ho komunidade atu buka solusaun ba rai iha área Marconi, tanba rai iha fatin ne’e pertense ba iha domíniu públiku. “Tuir rejime espesiál númeru 13/2017 kona-ba titularidade bens e imoveis, Estadu maka direitu administra no jere rai domíniu públiku”, akresenta.
Advogadu privadu Rede ba Rai, Julio da Silva, hateten tuir rejime espesiál númeru 13/2017 kona-ba titularidade bens imoveis ko’alia klaru katak 50 metru husi tasi mai ne’e, rai ne’e pertense ba Estadu.
Jornalista : Natalino Costa
Editora : Rita Almeida
