HEADLINE, SAÚDE

Ministra Saúde atualiza rezultadu vizita nasaun haat ba PM Taur

Ministra Saúde atualiza rezultadu vizita nasaun haat ba PM Taur

Ministra Saúde, Odete Maria Freitas Belo. Imajen Tatoli/Francisco Sony

DILI, 22 setembru 2022 (TATOLI)–Ministra Saúde (MS), Odete Maria Freitas Belo, kinta ne’e, hasoru Primeiru-Ministru (PM), Taur Matan Ruak, hodi atualiza rezultadu vizita traballu bá nasaun Bhutan, Indonézia, Malázia no Cuba.

“Ha’u mai relata serbisu ne’ebé halo iha rai-li’ur, partisipa iha enkontru nível asionál ne’ebé organiza hosi Organizasaun Mundiál Saúde (OMS). Aleinde ne’e vizita mós bá nasaun sira ne’ebé Governu halo kooperasaun hanesan Indonézia, Malázia, no Cuba,” Ministra hateten hafoin hasoru Xefe Governu iha Rezidénsia Farol.

Vizita bá Indonézia hodi haree kondisaun pasiente timor-oan ne’ebé daudaun hala’o tratamentu saúde iha Ospitál Siloam iha Kebon Jeruk, Jakarta (Indonézia).

“Haree dalan saida bele halo tanba daudaun Ministériu Saúde iha preparasaun atu estabelese sentru kardíaku no onkolojia,” nia akresenta.

Notísia relevante: MS planu sosa ekipamentu kardiolojia hodi redús transfere pasiente bá diáspora

Nune’e mós, vizita bá Ospitál Iheal Medical Centre, iha Kuala Lumpur, Malázia, ne’ebé Governu halo kontratu hodi fó tratamentu ba pasiente timor-oan sira.

“Ha’u haree pasiente sira ne’ebé halo tratamentu no tempu hanesan haree saida mak sira bele apoia ba ita iha área kapasitasaun. Maski ita-nia médiku sira labele bá eskola iha ne’ebá tanba nível universidade a’as, maibé ita bele serbisu hamutuk hodi lori médiku na’in-haat akompaña pasiente timor-oan sira iha ne’ebá. Nune’e bele serbisu hamutuk ho médiku sira iha ospitál Malázia no Indonézia iha ita-nia ospitál bainhira Timór iha ona sentru kardíaku no onkolojia,” Ministra tenik.

Enkuantu, vizita bá Cuba tanba médiku timor-oan sira daudaun prepara hela hasai espesialista iha área oioin. Tempu hanesan ko’alia nafatin kona-ba estabelesementu sentru rua tanba durante ne’e sira mak apoia hela Timór.

“Hosi vizita ne’e, ha’u husu sira apoia ita iha sentru rua ne’e ein termu halo intervensaun ba pasiente sira bainhira ita presiza no ajuda estabelese sentru rua,” governante ne’e salienta.

Ministra Odete halo vizita traballu iha agostu 2022 no fila hikas iha loron 18 setembru 2022.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!