HEADLINE, SAÚDE

Ministra Saúde rekoñese pasiente iha Indonézia hasoru difikuldade

Ministra Saúde rekoñese pasiente iha Indonézia hasoru difikuldade

Ministra Saúde, Odete Maria Freitas Belo. Imajen Tatoli/Francisco Sony

DILI, 22 setembru 2022 (TATOLI)–Ministra Saúde (MS), Odete Maria Freitas Belo, rekoñese, família pasiente sira ne’ebé akompaña pasiente halo tratamentu iha Ospitál Siloam Hospitals, Kebon Jeruk, Jakarta (Indonézia) hasoru difikuldade liuliu hela fatin.

“Ha’u bá vizita fatin ne’ebé Governu aluga hodi pasiente nia família hela, la’ós dehan a’at tebes maibé fatin ne’ebé dignu bá sira hodi hela. Pasiente balun keixa tanba ladún di’ak, ita hakarak aluga fatin di’ak maibé persiza orsamentu, maibé tenki haree mós fatin besik liu iha ospitál nune’e bainhira sira ba haree família (pasiente) karik la’o de’it bá, fatin ne’ebé sira kestiona mak fatin ne’ebé besik ospitál,” Ministra hateten hafoin relata serbisu ba Primeiru-Ministru, Taur Matan Ruak, iha Rezidénsia Farol, kinta ne’e.

Notísia relevante: MS sei transfere pasiente 20-resin bá tratamentu médiku iha diáspora

Ministra Saúde ho delegasaun hala’o vizita ba Ospitál Siloam iha loron 16 setembru 2022.

Serbisu sira ne’ebé Hospital Nacional Guido Valadares (HNGV) labele atende mak transfrere serbisu sira bá rai-li’ur hanesan atendimentu ba pasiente ho moras króniku.

“Iha ha’u-nia vizita ne’e akompaña mós hosi médiku sira ho responsável ospitál rai ne’ebá nian no molok halo vizita sira, halo uluk aprezentasaun pakote saida mak oferese ba sira rasik hanesan mós ba ita. Vizita mós pasiente sira toba iha ospitál, haree toba fatin, hahán, ne’ebé ha’u haree ba di’ak,” nia haktuir.

Daudaun ne’e, problema pasiente sira mak orsamentu ba hahán no alojamentu dalaruma simu tarde.

Ministra Saúde dehan, bainhira seidauk ba haree kondisaun pasiente ho matan, dala ruma gosta hirus tanba gasta osan, maibé bainhira haree ona maka nota katak pasiente sira  presiza duni tratamentu maski iha rai-li’ur no hela iha tempu naruk.

Tuir dadus hosi Diresaun Nasionál Apoia Ospitalár no Emerjénsia iha Ministériu Saúde, hosi fulan-janeiru to’o setembru, Governu konsege halo transferénsia pasiente 157 halo tratamentu médiku iha Ospitál Indonézia, Malázia no Singapura, ne’ebé hosi númeru ne’e, na’in-hitu mak mate tanba ho moras komplikasaun no daudaun pasiente 57 mak kontinua halo tratamentu saúde.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!