HEADLINE, SAÚDE

MS prontu implementa deklarasaun Paro kona-ba saúde mentál

MS prontu implementa deklarasaun Paro kona-ba saúde mentál

Ministra Saúde, Odete Maria Freitas Belo. Imajen Tatoli/Francisco Sony

DILI, 22 setembru 2022 (TATOLI)—Ministériu Saúde (MS) prontu implementa deklarasaun konjunta ne’ebé hasai hosi membru sira hosi Organizasaun Mundiál Saúde (OMS), iha Paro, Bhutan.

“Enkontru rutina ne’ebé halo iha Bhutan, normalmente kuandu iha enkontru sira hanesan ne’e, hamosu deklarasaun ruma. Deklarasaun ne’ebé importante liga ho saúde mentál sai hanesan programa prioridade hodi hamosu iha deklarasaun,” Ministra Saúde, Odete Maria Freitas Belo, hateten, hafoin relata serbisu ba Primeiru-Ministru (PM), Taur Matan Ruak, iha Rezidénsia Farol, kinta ne’e.

Notísia relevante: PRADET fó formasaun “Promove Saúde Mentál” ba ajente pastorál parokia Bedois

Deklarasaun konjunta ne’e, Ministru no Ministra Saúde membru OMS asina iha loron 06 setembru 2022, iha Paro, Bhutan, ne’ebé prioritiza ba saúde mentál tanba liga ho moras COVID-19 ne’ebé fó impaktu boot tebes ba ema sira.

“Ema barak mak sofre hanoin barak tanba lakon serbisu, tanba fábrika sira taka, balun halo negósiu di’ak hela maibé depois ho moras ne’e negósiu tenki taka, halo ema frustadu barak, tanba ne’e afeta tebes ba ema-nia mentál,” nia akresenta.

Timor-Leste hamahan-an iha OMS, tanba ne’e desizaun saida mak foti hamutuk, la’ós OMS mak foti maibé ne’e membru Governu, hanesan Ministru ka Ministra Saúde sira hamutuk na’in-16 mak halo deklarasaun.

“Bainhira membru sira ne’e halo deklarasaun, signifika mai atu implementa iha idaidak nia nasaun,” nia tenik.

Governnate ne’e dehan, molok partisipa iha reuniaun, hosi Ministériu Solidariedade Sosiál no Inkluzaun informa ona atu kria program hodi prioritiza ema ho moras mentál.

“Molok ha’u ba enkontru, Ministra Solidariedade Sosiál no Inkluzaun ko’alia ona ho ha’u atu tau-matan ba pasiente ho moras mentál, maibé ha’u la ko’alia ba nia tanba ha’u hatene asuntu ne’e sei ko’alia ho OMS. Entaun ho deklarasaun ne’ebé hasai ona, ha’u iha baze forte katak Ministériu Saúde tau duni atensaun,” Ministru salienta.

Governante sira ne’ebé asina deklarasaun konjunta ne’e maka Ministru no Ministra Saúde hosi nasaun sira hanesan Bangladesh, Bhutan, Coreia Norte, Índia, Maldivas, Mianmar, Nepal, Sri Lanka, Tailándia, Indonézia, no Timor-Leste.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!