HEADLINE, KAPITÁL, NASIONÁL

Mudansa core telekomunikasaun TT kauza liña internet lentu

Mudansa core telekomunikasaun TT kauza liña internet lentu

Jornalista Agência Tatoli, Arminda Fonseca (klaran) no Isaura Lemos de Deus (liman karuk) halo entrevista ho Diretór Sistema Informasaun Timor Telecom (TT), Ladislau Saldanha (liman loos), iha edifísiu sentrál TT, Timor Plaza, kinta (22/09). Imajen/TT

DILI, 22 setembru 2022 (TATOLI)—Diretór Sistema Informasaun Timor Telecom (TT), Ladislau Saldanha, klarifika, relasiona ho preokupasaun públiku kona-ba liña internet lentu iha loron ikus ne’e, tanba iha mudansa core telekomunikasaun ne’ebé antes ne’e iha Ministériu Transporte Komunikasaun (MTK) muda fali bá Caicoli.

“Ami rekoñese liña internet lentu tanba ami halo mudansa foun ba core telekomunikasaun TT nian, nune’e bainhira servisu seluk rekupera ona, maibé servisu ba facebook no google seidauk bele halo sinkronizasaun kompletu tanba presiza tempu naruk atu halo nakonu fali, espera semana ida ka rua tan liña internet bele normál fali,” Diretór ne’e informa ba Agência Tatoli, iha ninia knaar fatin, edifísiu sentrál TT, Timor Plaza, kinta ne’e.

Notísia relevante: ANC halo ona notifikasaun ba operadór Timor Telecom relasiona internet lentu

Nia dehan, operadór telekomunikasaun ne’e halo mudansa ba fatin tanba tuir kontratu entre MTK ho TT, katak obrigatóriu tenke hamamuk edifísiu ministériu, nune’e TT tenke instala fali ekipamentu foun iha edifísiu rasik.

“Mudansa ida-ne’e, iha fatór balun ne’ebé TT labele kontrola tanba kontratu ho fornesedór boot hanesan facebook no google, ne’ebé tuir regra parseiru sira ne’e, katak bainhira iha mudansa ekipamentu hosi fatin ida ba fatin seluk tenke hamamuk servidór ka hamoos nia cache.

Relasiona ho mudansa ba core telekomunikasaun, TT rekoñse katak iha área balun liña internet lentu no iha parte balun lais.

“Iha parte balun ne’ebé internet neneik ne’e tanba kliente barak no TT tenta hadi’a servisu ho aumenta Base Transceiver Station  (BTS), upgrade balun ba 4G⁺ iha Dili, no tuir alvu molok ramata tinan ne’e ita sei monta BTS hamutuk 270 ba 4G⁺, ho objetivu halo utilizasaun liña internet lais,” Diretór ne’e esplika.

Aleinde ne’e, hosi lamentasaun kliente kona-ba internet lentu, operadór telekomunikasaun ne’e rekoñese katak kliente balun adere ba kampaña ne’ebé la tuir ninia nesesidade.

“Ba ida-ne’e ami sujere atu kontaktu call center 172, loja ka liuhosi pájina facebook TT nian, tanba laiha kabu submarinu ne’ebé bele fornese internet lais no baratu,” nia tenik.

Timor Telecom, S.A. eziste desde 17 outubru 2002, nu’udar sosiedade anónima dahuluk ne’ebé harii iha rai-laran, ne’ebé operadór telekomunikasaun ne’e fó ona serbisu ba timor-oan lubuk no fó apoiu ba atividade Governu no sosiál sira.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!