DILI, 22 setembru 2022 (TATOLI)—Diretór Ezekutivu empreza Bolloré, Olivier de Noray, no Diretór Ezekutivu Timor Port SA, Laurent Palayer, kinta ne’e, hasoru malu ho Primeiru-Ministru (PM), Taur Matan Ruak, hodi informa kona-ba preparativu sira liga ho serimónia inagurasaun Portu Tibar.
“Portu ne’e ami bele akumula kontentór kuaze 12.000, maibé ami hahú ho kontentór 1.000. Primeiru-Ministru apresia tanba portu ne’e bele hahú halo operasaun,” nia tenik.
Portu Tibar sei hahú operasaun iha fulan-setembru nia laran no iha 28 novembru 2022 sei halo inaugurasaun.
“Ami mai halo diskusaun ho Primeiru-Ministru, hodi hateten katak prontu ona hahú operasaun iha Portu Tibar iha semana-oin, prontu simu vizitór no halo operasaun, nune’e prontu deliver sasán sira ne’ebé maka mai iha portu ne’e rasik,” Diretór Ezekutivu empreza Bolloré, Olivier de Noray, informa hafoin hasoru Xefe Governu iha Rezidénsia Farol.
Notísia relevante: Portu Tibar halo deskarregamentu dahuluk ba kontentór 200 resin hosi Singapura
Daudaun ekipa responsável sira halo preparasaun ekipamentu informátika inklui sistema ne’ebé bele servisu ho Costum Authority.
Primeiru-Ministru, Taur Matan Ruak, halo lansamentu konstrusaun Portu Tibar iha loron 30 agostu 2018 no tuir planu finaliza konstrusaun iha maiu 2022, maibé tanba situasaun pandemia maka halo prosesu la’o neneik.
Portu Tibar lokaliza iha kilómetru 10 hosi Oeste Dili, iha Baía Tibar, munísipiu Liquiçá, ne’ebé hanesan infraestutura prioritária ne’ebé identifika ona iha Planu Estratéjiku Dezenvolvimentu Nasionál (PEDN) 2011-2030.
Projetu ne’e hanesan konstrusaun nível internasionál, ne’ebé ezekuta liuhosi Timor-Port S.A ho modalidade Parseria Públika Privada (PPP), ne’ebé halo konsórsiu ho Bolloré no Governu Timor-Leste.
Governu aloka millaun $130, Timor Port no Bolloré hamutuk millaun $150, ho totál millaun $280 ba faze inísiu, ba prosesu konstrusaun Portu Tibar.
Totál investimentu orsamentu ba Portu Tibar to’o tinan 30 ho valór millaun $500.
Jornalista : Antónia Gusmão
Editora : Julia Chatarina
