HEADLINE, MUNISÍPIU, VIQUEQUE

Stock ai-moruk menus iha postu saúde Matahoi

Stock ai-moruk menus iha postu saúde Matahoi

Postu saúde Matahoi. Imajen Tatoli/Vitorino Lopes da Costa

VIQUEQUE, 22 Setembru 2022 (TATOLI)—Enfermeiru postu saúde suku Matahoi, postu Uatulari, Jacinto Amaral, informa, distribuisaun ai-moruk kada fulan sempre iha limitasaun, nune’e stock ai-moruk kontinua menus iha postu saúde Matahoi.

“Ami sempre hato’o relatóriu kada fulan maibé ai-moruk mai la tuir relatóriu ne’ebé ami haruka bá,” Enfermeiru hateten iha postu saúde Matahoi, kinta ne’e.

Relatóriu ai-moruk kada fulan ne’ebé haruka ba postu saúde Matahoi maka pomada ba matan chloromtemicas iha tablet 190, dexamethazone 676, Cloromthemicol laiha, Coptopril tablet 25, prometazone tablet 25, vitamin B iha 200, no vitamin B6 iha 306, maibé la sufisiente hodi responde nesesidade abitante sira.

Daudaun ne’e, stock aimoruk ne’ebé menus iha postu saúde Matahoi maka amoxicline, paracetamol, ai-moruk xipro no multi vitamina.

“Tanba ne’e, ami hakarak husu Ministériu Saúde haree ai-moruk sira ne’ebé kada fulan haruka mai tanba sempre menus. Ami-nia sujestaun ne’e bazeia ba ami-nia relatóriu, ne’ebé ami haruka ba hodi tau konsiderasaun,” nia akresenta.

Notísia relevante: Stock ai-moruk paracetamol hotu iha postu saúde Irabin de Cima

Nia dehan, bainhira nível pesoál saúde sira halo enkontru sempre hato’o limitasaun ai-moruk ba nível altu sira hodi konsidera tanba ai-moruk nu’udar nesesidade bázika komunidade.

Postu saúde matahoi iha aldeia rua nia klaran hanesan aldeia Inaboba no Uanama, ne’ebé besik mós eskola Sekundáriu Xabika Besi Kulit, Pre-Sekundáriu 07 Uatulari, ho totál abitante ne’ebé asesu ba postu saúde hamutuk 1.456.

Iha fatin hanesan, Doutór postu saúde, Luís Sarmento Belo, relata, hahú hosi fulan-janeiru to’o agostu, postu saúde Matahoi rejista kazu moras hanesan Insfesaun Respiratóriu Aguda (ISPA) hamutuk 515, diareia 90, moras la daet (tensaun) 50, asma iha 25 no moras sira seluk.

“Hosi dadus moras sira-ne’e, kazu moras a’as liu maka ISPA, tanba ita haree depende ba klima. Kazu ISPA bainhira pasiente sira mai, ami fó tratamentu ho aimoruk antibiótiku, depende kazu ne’ebé iha,” nia hato’o.

Dezafiu ne’ebé pesoál saúde sira enfrenta maka limitasaun ai-moruk tanba kada loron vizitante ne’ebé mai postu saúde iha 30 to’o  40.

Pesoál destaka iha Postu Saúde Matahoi hamutuk haat, kompostu hosi doutór ida, enfermeira  rua, no parteira ida.

Jornalista   : Vitorno Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!