HEADLINE, MUNISÍPIU, SAÚDE, VIQUEQUE

Stock ai-moruk paracetamol hotu iha postu saúde Irabin de Cima

Stock ai-moruk paracetamol hotu iha postu saúde Irabin de Cima

Postu Saúde Irabin de Cima. Imajen Tatoli/Vitorino Lopes da Costa

VIQUEQUE, 04 agostu 2022 (TATOLI)—Postu Saúde Irabin de Cima, iha postu administrativu Uatucarbau, munisípiu Viqueque, kuaze semana rua ona stock ai-moruk paracetamol hotu.

“Dalaruma pasiente sira mai halo konsulta, ami atu fó ai-moruk paracetamol laiha, ami haruka sira filafali bá uma. La’ós dehan stock iha maka ami la fó ba pasiente sira, maibé stock maka hotu foin lalais ne’e,” Enfermeira Postu Saúde Irabin de Cima, Nelia Fernandes, informa ba Agência Tatoli, iha Postu Saúde Irabin de Cima, kinta ne’e.

Notísia relevante: SAMES husu responsavel fasilidade saúde jere ai-moruk báziku ho di’ak

Pesoál saúde sira iha postu ne’e haruka ona karta ba Sentru Saúde Uatucarbau, maibé iha ne’ebá stock mós hotu, nune’e sentru saúde haruka tan pedidu ba munisípiu Viqueque maka foin bele haruka mai postu.

“Ami mai halo atendimentu ba ita-nia komunidade bazeia ai-moruk sira ne’ebé iha,” nia akresenta.

Aleinde ne’e , postu saúde suku Irabin de Cima rejista númeru kazu infesaun vias respiratóriu (ISPA) hosi fulan-maiu to’o jullu hamutuk 155, kompostu hosi feto 76 no mane 79, enkuantu rejista moras sira seluk maibé númeru kiik maka hanesan moras dermatite no iis-boot.

“Durante ne’e ami rejista kazu ISPA maka barak, moras sira seluk iha maibé ladún, maibé ami haree moras sira ne’ebé mai grave, ami tenki haruka ba sentru saúde hodi hetan tratamentu. Tanba iha ne’e laiha profesionál doutór no parteira,” nia hato’o.

Profisionál saúde ne’ebé destaka iha postu saúde Irabin de Cima hamutuk rua, kompostu hosi enfermeira ida no saúde públika ida, enkuantu totál populasaun iha suku ne’e hamutuk 672.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!