iklan

HEADLINE, MUNISÍPIU, VIQUEQUE

Estudante 176 hosi Eskola ESJ Calixa prepara partisipa ezame nasionál

Estudante 176 hosi Eskola ESJ Calixa prepara partisipa ezame nasionál

Estudante Eskola ESJ Calixa iha sala aula. Imajen Tatoli/Vitorino Lopes da Costa

VIQUEQUE, 23 setembru 2022 (TATOLI)–Estudante finalista hamutuk 176 hosi Eskola Ensinu Sekundáriu Jerál (ESJ) Calixa Viqueque preparadu partisipa ezame nasionál iha fulan-outubru.

“Ami halo ona levantamentu dadus ba estudante hosi siénsia teknólojia no siénsia sosiál no ami aprezenta ba Servisu Edukasaun munisípiu Viqueque atu sira haruka ba kurríkulu no avaliasaun nasionál,” Diretór ESJ Calixa, Rozito Soares do Rosário, informa ba Agência Tatoli, iha Eskola Calixa, Beobe, sesta ne’e.

Prosesu tuir mai, profesór sira sei hein númeru ezame hodi tau iha dena aula no kartaun ezame ba finalista sira.

“Daudaun ne’e ami hein númeru ezame hosi kurríkulu no avaliasaun nasionál. Kona-ba persentajen hosi ezame, parte kurríkulu nasionál haruka ona mai edukasaun Viqueque no edukasaun haruka ona ba ami katak matéria ba ezame nasionál foti hosi ezame primeiru no
no segundu ano,” nia akresenta.

Notísia relevante: Estudante ESJ Sabika Besik Kulit Uatulari 287 sei partisipa ezame nasionál

Tuir kurríkulu nasionál, sei foti matéria ba ezame nasionál hosi klase I 30%, klase II 30% no klase III 40%.

“Tanba ne’e, ami hosi parte eskola aprezenta ona ba profesór kada disipliña ida-idak. Nune’e daudaun ne’e profesór disiplina nian halo hela preparasaun hodi kompleta presentajen kurríkulu nasionál haruka mai eskola,” nia hato’o.

Aleinde ne’e, iha matéria neen ne’ebé tama ezame nasionál no fó ona ba estudante maibé profesór matéria lian portugés laiha fatin.

“Entre matéria neen ba ezame nasionál, iha materia lima maka dadaun profesór sira kontinua hanorin estudante, maibé profesór matéria lian portugés sei ba tuir formasaun iha INFORDEPE Dili. Ami espera iha semana oin profesór lian portugés bele fila mai hodi hanorin estudante sira atu ba ezame nasionál. Maski tempu limitadu ona, ami sei esforsu hodi hanori estudante finalista sira ba partisipa ezame nasionál ho di’ak,” nia tenik.

Diretór eskola ne’e husu ba estudante atu foku estuda, nune’e bele hetan valór di’ak iha ezame nasionál 2022.

Dadus estudante finalista hosi tinan 2022 iha área siénsia sosiál hamutuk 84 no siénsia teknólojia hamutuk 92.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!