VIQUEQUE, 23 setembru 2022 (TATOLI)-–Progresu konstrusaun fíziku Eskola Ensinu Sekundáriu Jerál (ESJ) Calixa, iha suku Uma Quic, postu administrativu Viqueque vila, munisípiu Viqueque, ne’ebé implementa hosi grupu komunitáriu liuhosi projetu komunitáriu, daudaun atinje ona 26,8%.
“Progresu ne’e ami aprezenta ona ba Diresaun Servisu Edukasaun hodi prepara ba faze daruak. Tuir loloos projetu konstrusaun finaliza ona iha fulan-agostu ka setembru nia laran, maibé iha mudansa balun mosu, entaun ami paradu durante fulan-tolu,” Prezidente projetu komunitáriu no atuál Diretór ESJ Calixa, Rozito Soares do Rosário, hateten ba Agência Tatoli, iha ninia knaar fatin, Beobe, sesta ne’e.
Notísia relevante: Reabilitasaun eskola lima projetu komunitáriu Viqueque finaliza ona
Konstrusaun paradu durante fulan-tolu tanba Ministériu Edukasaun Juventude no Desportu (MEJD) halo mudansa ba matadalan konstrusaun komunitáriu.
“Ami paradu tanba orsamentu faze daruak la sai, tanba ne’e ami labele kontinua halo serbisu. Ho ida-ne’e tekniku, traballadór no badaen sira livre tanba laiha materiál no orsamentu,” nia akresenta.
Semana kotuk foin iha orsamentu faze daruak, nune’e iha semana oin foin hahú konstrusaun.
“Oras-ne’e ami kontinua halo preparasaun ba faze daruak 50% no ami-nia tezoreira mós ba sosa ona materiál iha Dili. Ami sei hahú segunda oin no kontinua konstrusaun ba faze daruak nian,” nia tenik.
Konstrusaun edifísiu ESJ Calixa tuir previzaun antes sei finaliza iha fulan-novembru maibé tanba orsamentu tarde maka sei finaliza iha dezembru.
“Ha’u nafatin orienta tékniku, traballadór no badaen sira mai ativa fali halo konstrusaun. Parte traballadór grupu kumunitáriu nafatin implemetan tuir dezeñu hodi bele garante kualidade. Ami hasoru dezafiu hanesan falta orsamentu hosi ministériu, maibé ami espera ba oin orsamentu labele tarde tan atubele aselera konstrusaun,” Responsável ne’e relata.
Konstrusaun edifísiu ESJ Calixa ho kustu $113.359,66 ba sala tolu no sentina ida.
Projetu komunitáriu ne’ebé implementa iha Viqueque lansa fatuk dahuluk iha fevereiru 2022, ba konstrusaun infraestrutura iha eskola 18.
Jornalista : Vitorino Lopes da Costa
Editora : Julia Chatarina
