iklan

DILI, HEADLINE, POLÍTIKA

Vise PM Santa Sé agradese PN aprova rezolusaun adota dokumentu fraternidade umana

Vise PM Santa Sé agradese PN aprova rezolusaun adota dokumentu fraternidade umana

Vise Primeiru-Ministru Santa Sé, Arsebispu Edgar Peña Parra simu prezente hosi Prezidente Parlamentu Nasionál, Aniceto Longuinhos Guterres Lopes, iha Parlamentu National, sesta 23 setembru 2022. Imajen Tatoli/Antonio Daciparu.

DILI, 23 setembru 2022 (TATOLI)—Vise Primeiru-Ministru Santa Sé ne’ebé subtitui hosi Sekretária Estadu, Arsebispu Edgar Peña Parra, agradese ba Parlamentu Nasionál (PN) Timor-Leste aprova rezolusaun adota kona-ba dokumentu Pás Mundiál, Fraternidade Umana no Koezisténsia Komun.

Notisia Releavante:PN aprova rezolusaun adota deklarasaun Pás Mundiál ho unanimidade

Vise Primeiru-Mministru Santa Sé, Arsebispu Edgar Peña Parra. Imajen Tatoli/Antonio Daciparu

“Agradese ida ne’e Parlamentu iha mundu hanesan Parlamentu Timor-Leste nu’udar dahuluk  aprova adota dokumentu kona-ba fraternidade umana, ne’ebé kria ona mós sentru, nasaun ne’e interese tebes. Ha’u hanoin ida-ne’e importante tebes. Timor-Leste hanesan nasaun ida, ba oin Parlamentu sempre iha nia sorin,” Vise PM Santa Sé ne’e hateten ba jornalista sira hafoin halo vizita ba iha Parlamentu Nasionál, sesta ne’e.

Durante vizita ne’e, Arsebispu Edgar Peña Parra hala’o enkontru ho Prezidente Parlamentu Nasionál, Aniceto Longuinhos Guterres Lopes, ne’ebé akompañadu hosi Xefe Bankada Parlamentár sira.

“Enkontru ne’e hanesan enkontru ikus antes fila-fali ba Roma, simu konvite hosi Prezidente Parlamentu hodi ko’alia misaun Parlamentu halo lei no renovasaun lei iha nasaun ne’e tuir baze Estadu,” nia hateten.

Iha enkontru ne’e, ko’alia mós vizita Papa Francisco mai Timor-Leste posibilidade iha tinan oin, no deskute mós asuntu sira iha nasaun ne’e hanesan edukasaun, sosiál no papél importánsia igreja nian iha libertasaun akompaña besik ho povu.

Iha momentu ne’e, igreja kontinua akompaña povu timorense, ne’ebé  prosesu tinan 20 nasaun foun ne’e restaura nia indepedénsia no ninia dezenvolvimentu ba oin liu-liu ho esforsu sira atu hasa’e sidadaun hosi ki’ak.

Prezidente Parlamentu Nasionál, Aniceto Longuinhos Guterres, hateten vizita kortezia Vise PM Santa Sé mai Timor-Leste hanesan bainaka Estadu nian tomak nian la’ós ba igreja de’it, tanba mai inaugural edifísiu embaixada Nunsiatória Apostólika nian no ikus liu ohin mai halo vizita iha PN.

Prezidente Parlamentu Nasionál, Aniceto Longuinhos Guterres Lopes. Imajen Tatoli/Antonio Daciparu.

Iha vizita ne’e, Vise PM hato’o mós hato’o agradesimentu lori igreja katólika nia naran ba PN nu’udar órgaun lejisladór ne’ebé halo lei, inklui lei sira ne’ebé PN prodús tiha ona no aprova kona-ba lei sira fasilita misionáriu sira igreja ninian, fasilita sira-nia servisu hodi hetan vistu iha rai-laran barak liu agora la sala to’o tinan lima bele estende.

Aleinde ne’e, PN aprova rezolusaun ida adota dokumentu Fraternidade Umana sai dokumentu nasionál no foin daudaun lansa tiha ona sentru iha Prezidénsia Repúblika no iha tiha ona simpóziu ida kona-ba fratenidade umana.

“Purtantu, PN asume ninia papél nu’udar lejisladór ho órgaun desizaun polítika no desizaun hola hotu ona, agora oinsá ita interioriza implementa iha ita-nia vida loro-loron kona-ba saida mak fraternidade umana,” nia hateten.

Lidér Segundu Órgaun Soberania ne’e hamutuk ho Xefe Bankada Parlamentár sira husu ba Vise PM Sant Sé atu Amu Papa Francisco bele mai vizita Timor-Leste iha tinan oin (2023).

“Hanesan reprezentante povu, ohin, ha’u hato’o ba Vise PM Santa Sé nian, hato’o povu Timor-Leste ne’ebé maioritariamente katóliku 90%-resin nia dezeju, solisita Papa Francisco nia vizita ba tinan oin, no ita hein Papa nia disponivilidade no nia desizaun atu vizita maib’e iha sá loron mak atu mai ne’e ita seida’uk hatene,” nia dehan.

Notísia Relevante: PR Horta-Vise PM Santa Sé lansa Sentru Fraternidade Umana Timor-Leste

Jornalista : Nelson de Sousa

Editór        : Cancio Ximenes

 

iklan
iklan

Leave a Reply

iklan
error: Content is protected !!