PNTL-DNTT instala sinál tránzintu iha área engarrafamentu
DILI, 24 setembru 2022 (TATOLI)-Komandu Polísia Nasionál Timor-Leste liuhosi seksaun tránzitu munisípiu Dili, serbisu hamutuk ho Diresaun Nasionál Transporte Terrestre (DNTT), instala sinál tránzitu iha área ne’ebé konsidera hanesan provoka engarrafamentu.
Sinál tránzitu ne’ebé PNTL no DNTT monta iha área sira hanesan iha dalan kruzamentu Maloa, Bairru-Pité nian, diresaun sa’e hosi Bebora labele sa’e loos ba Ponte Maloa nian ba mosu Vila Verde nian, polísia monta sinál labele para iha área Tribunál Distritál Dili nian, tanba fatin refere sempre mosu engarrafamentu.
Alende ne’e mós ekipa monta sinál tránzitu iha edifísiu Institutu Apoia Dezenvolvimentu Emprezariál (IADE) nia oin, Bairru dos Grilhos iha área kafé Brazil nian, tanba fatin hirak-ne’e konsidera sempre mosu engarrafamentu.
Komandante Tránzitu Munisípiu Dili, Inspetór Domingos Gama, informa, parte tránzitu hamutuk ho DNTT monta tán sinál tránzitu iha Dili, liuliu ba área ne’ebé sempre mosu engarrafamentu nune’e fó hanoin ba motorista bele kumpri hodi labele provokaka mosu engrafamentu iha dalan publiku.
“Atividade ohin ne’e ami monta sinál tránzitu ba iha área sira-ne’ebé ami identifika sempre mosu engarrafamentu, atu nune’e fó hanoin ba ita-nia motorizada sira atu labele para motorizada no karreta arbiru iha dalan pibliku hodi ita bele evita engarrafamentu. Atividade ida-ne’e rasik la ho osan maibé tanba liuhosi serbisu kordenada PNTL no DNTT,” nia informa ba jornalista sira iha área Tribunál Distritál Dili, Colmera, sábadu ne’e.
Nia dehan, hahú segunda semana oin husu ba motorista sira tenke kumpre ona sinál tránzitu sira-ne’ebé montaona.
“Ohin no aban ne’e ita sei tolera, maibé husu ba motorista kumpre sinál tránzitu ne’ebé maka monta ona ne’e hanesan área Tribunál Distritál Dili, labele para, semana oin labele para tan karreta no motorizada iha área ne’e, se la kumpre ami sei halo apreensaun no aplika multa ba ita-boot sira,” Inspetór Domingos Gama hateten.
Komandante Tránzitu Munisípiu Dili, ne’e, lamenta ho motorista balun kontinua la hatudu konxiénsia hodi kumpre regra tránzitu nian.
“Ita monta sinál tránzitu barak ona iha Dili hodi fó hanoin ba ita-nia motorista sira atu kumpre,” nia fó hanoin.
Entretantu, montajen sinál tránzitu iha área Dili laran partisipa direta hosi Komandante Tránzitu Munisipiu Dili, Inspetór Domingos Gama no Diretór Nasionál Transporte Terestre (DNTT), António da Costa.
Jornalista: Nataalino Costa
Editór: Evaristo Soares Martins
