DILI, 26 setembru 2022 (TATOLI)–Autoridade Protesaun Sivil (APC, sigla portugés) apela ba komunidade, liuliu iha Dili atu hela dook hosi fatin risku ba dezastre naturál tanba lakleur tan tempu udan.
“Ita kontente hotu bainhira situasaun normál, maibé situasaun dezastre ita hotu triste tanba dezastre mai la halo diskriminasaun, ho nune’e Protesaun Sivil husu ho haraik-an atu komunidade hela dook hosi fatin risku sira. Dezastre naturál ne’ebé akontese ona sai nu’udar lisaun ba ita hotu. Ita apreende ona nia di’ak no ladi’ak,” Prezidente APC, Ismael da Costa Babo, hato’o apelu ne’e liuhosi Agência Tatoli, iha ninia knaar fatin Caicoli, segunda ne’e.
Notísia relevante: Protesaun Sivíl rejista vítima dezastre naturál 32 iha Baucau
Prezidente Autoridade apela liuliu ba populasaun sira ne’ebé hela besik mota Comoro, foho-lolon no iha área Tasi-tolu.
“Apela mós ba komunidade iha munisípiu sira ne’ebé hela besik mota no foho-lolon ne’ebé risku ba rai-halai, ami husu atensaun no husu karik bele dezastre seidauk akontese bele muda ona bá fatin ne’ebé laiha risku, karik hadomi imi-nia vida, tanba prevensaun ida-ne’e hola parte iha vida,” nia fó hanoin.
Aleinde ne’e, APC mós husu karik iha dezastre ruma tenki hases-an lalais no kontaktu kedas ba ekipa Protesaun Sivil ka informa ba autoridade lokál ne’ebé besik hodi husu asisténsia lalais.
“Husu atu akompaña informasaun sira ne’ebé fó sai hosi Diresaun Nasionál Meterolojia Timor-Leste, nune’e bainhira halo viajen karik bele atensaun ba udan, rai halai, no fatuk monu iha dalan sira, anin boot halo ai tohar, tanba atu hases-an hosi dezastre ne’e mak ita halo uluk prevensaun,” nia tenik.
APC identifika ona katak Dili iha área risku 50% ba dezastre naturál, liuliu mota Comoro, Tasi-tolu no rai-lolon sira.
“Populasaun tenki iha konsiénsia atu labele soe foer arbiru, tanba bainhira sor foer arbiru no udan mai foer sira ne’e taka bee-dalan halo bee la sai, entaun hamosu bee-sa’e uma. Dezastre iha loron 4 abril 2021 hamate ema na’in-40 resin ona. Ita husu boot katak labele lakon tan ema-nia vida,” nia akresenta.
Jornalista : Antónia Gusmão
Editora : Julia Chatarina
