iklan

NASIONÁL, HEADLINE, KAPITÁL

APC konsidera prosesu burokrasia sai obstákulu atendimentu emerjénsia

APC konsidera prosesu burokrasia sai obstákulu atendimentu emerjénsia

Prezidente Autoridade Protesaun Sivil, Ismael da Costa Babo. Imajen Tatoli/Francisco Sony

DILI, 26 setembru 2022 (TATOLI)–Prezidente Autoridade Protesaun Sivil (APC, sigla portugés), Ismael da Costa Babo, hateten, prosesu burokrasia ba konkursu públiku sira sai obstákulu ba sira hodi halo atendimentu urjente ba situasaun emerjénsia.

“Realidade ida maka ami-nia kamioneta boot hodi fó atendimentu ba situasaun emerjénsia daudaun ninia konkursu públiku iha hela Komisaun Nasionál Aprovizionamentu (CNA, sigla portuges). Ameasa la’o daudaun ona maibé ami-nia konkursu la’o desde janeiru 2022 to’o ohin loron seidauk iha rezultadu, konkursu atu sosa karreta ba Protesaun Sivil, Bombeiru, matéria ba ai-han no la’ós ai-han. Burokrasia ne’e afeta tebes, hela fulan-tolu tinan 2022 ramata maibé ami seidauk simu karreta no sasán sira ne’e tanba konkursu sei iha hela aprovizionamentu, ida-ne’e obstákulu atu halo atendimentu ho lais ba akontesimentu ruma, burokrasia sira mak impede atendimentu emerjénsia,” Prezidente Autoridade relata ba Agência Tatoli, iha ninia knaar fatin, Caicoli, segunda ne’e.

Ekipamentu ne’ebé daudaun iha hela konkursu maka karreta pickup sia no karreta bombeiru neen, ho totál orsamentu millaun $1 resin.

Notísia relevante: MI sensibliza lei protesaun sivíl iha Maliana

Maski nune’e, Autoridade Protesaun Sivil iha hela rezerva ai-han no la’ós ai-han hosi tinan 2021 nian, nune’e bele halo estimasaun hodi responde ba situasaun emerjénsia sira, liuliu dezastre naturál, ho estimasaun ba família 1.000 resin.

“Ami haree hela atu refosa armazenamentu, liuliu ai-han no la’ós ai-han, normalmente akontese ona fó asisténsia ba vítima dezastre naturál sira. Buat ne’ebé sai preokupasaun ba ami maka burokrasia iha sistema konkursu, buat hotu la’o ho lei. Autoridade Protesaun Sivil tinan ne’e seidauk halo jestaun finanseira ketak maibé sei hamutuk hela ho Ministériu Interiór, maibé tinan 2023 bele hambrik mesak,” nia tenik.

Prezidente Autoridade Protesaun Sivil, dehan, bainhira tinan oin bele jere rasik orsamentu, nia husu ba Governu atu prevee fundu emerjénsia ho objetivu bele utiliza iha kualker momentu, kompara ho orsamentu normál liuhosi burokrasia naruk.

“Fundu emerjénsia ne’e kuandu desizaun deside bele uza, entaun bele uza hafoin halo relatóriu, tanba atendimentu emerjénsia ne’e kuandu laiha osan ita labele halo buat ida,” nia salienta.

APC preparadu fó atendimentu

Prezidente Autoridade ne’e afirma, Autoridade Protesaun Sivil preparadu ein termu rekursu no lojístiku atu halo atendimentu bainhira akontese  ka la akontese dezastre naturál. Tanba iha lei Protesaun Sivil hateten katak ajente Protesaun Sivil maka populasaun rasik maibé rekursu importante iha instituisaun mak Forsa Armada, Polísia, liña ministeriál, Cruz Vermelha no parseiru dezenvolvimentu.

“Protesaun Sivil halo koordenasaun ba prepasaun no guia hosi lei Protesaun sivil ne’e, nune’e bainhira iha dezastre ruma ita sei ativa sentru koordenasaun ba dezastre naturál no agora situasaun hanesan ne’e Protesaun Sivil halo hela nia servisu,” nia konta tuir.

Instituisaun ne’e foin estabelese fulan-tolu, nune’e sei halo preparasaun ba ninia estrutura sira, tanba antes ne’e estrutura iha munisípiu sira inklui Rejiaun Administrativa Espesiál Oé-cusse (RAEOA) la forte maibé agora ne’e iha hotu ona.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!