iklan

EKONOMIA, HEADLINE

IQTL seidauk sertifika produtu lokál molok exporta tanba laiha laboratóriu

IQTL seidauk sertifika produtu lokál molok exporta tanba laiha laboratóriu

Prezidente IQTL, I.P, Rosito de Sousa Monteiro. Imajen Tatoli/Egas Cristóvão

DILI, 26 setembru 2022 (TATOLI)—Institutu Kualidade Timor-Leste (IQTL, sigla portugés) estabelese ona maibé seidauk iha laboratóriu atu halo teste ba produtu lokál molok halo exportasaun.

“IQTL iha papél tuir dekretu-lei atu sertifika produtu rai-laran ka produtu lokál atu exporta. Daudaun institutu seidauk iha laboratóriu adekuadu, maibé sei iha prosesu estabelesimentu laboratóriu nune’e bele halo analiza ba produtu sira ne’e molok manda bá rai-li’ur,” Prezidente IQTL, Rosito de Sousa Monteiro, hateten ba Agência Tatoli, iha ninia knaar fatin, Timor Plaza, segunda ne’e.

Aleinde ne’e, institutu ne’e simu preokupasaun balun hosi empreza nasionál sira katak bainhira atu halo exportasaun kafé no produtu lokál seluk, to’o iha nasaun destinasaun ema la simu tanba laiha sertifikasaun kualidade produtu. Ema haruka tenke hetan lai karta autorizasaun hosi autoridade kompetente hanesan IQTL.

“Empreza mai hasoru ami no ami haruka karta ba Ministériu Negósiu Estranjeiru no Kooperasaun (MNEK) hamutuk ho Embaixadór sira ne’ebé mak eziste, katak IQTL daudaun ne’e seidauk iha kondisaun adekuadu halo analiza laboratóriu. Tanba ne’e iha konsiderasaun hosi parte nasaun ne’ebé mak simu produtu ne’e rasik hodi tama iha sira-nia nasaun,” nia esplika.

Notísia relevante: MTKI hamosu IQTL atu implementa sistema nasionál kualidade

IQTL bainhira iha ona sistema laboratóriu no atu haruka produtu lokál ba rai-li’ur, dahuluk empreza tenki hato’o pedidu ba institutu, hafoin ekipa tun rekolla amostra, halo analiza no bazeia ba rezultadu analiza laboratóriu ne’e mak foin komunika ba empreza katak produtu ho kualidade hanesan ne’e bele haruka ba nasaun sira.

“Tanba ita seidauk iha sistema laboratóriu, entaun IQTL halo kooperasaun ho Badan Standardisasi Nasional (BSN) no Badan Pengawas Obat dan Makanan (BPOM) hodi halo teste ba amostra ne’ebé ami haruka hodi analiza produtu,” nia akresenta.

IQTL koopera ho BSN no BPOM iha tinan 2021 hodi halo analiza ba produtu masin maibé ne’e ba konsumu iha rai-laran de’it, inklui koopera ho biokímiku indonéziu hodi halo analiza kafé.

Antes ne’e, institu simu ona pedidu ida hosi empreza lokál Souru Coconut Oil Unipessoal, Lda atu halo analiza ba kualidade produtu.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!