Membru PN husu Governu kontrola ajénsia haruka traballadór timoroan ba rai-li’ur
DILI, 26 setembru 2022 (TATOLI)—Membru Deputadu Parlamentu Nasionál (PN) kontinua bolu atensaun no husu ba Governu atu kontrola ajénsia sira-ne’ebé haruka traballadór timoroan ba buka servisu iha rai-li’ur, nune’e ikus mai timoroan sira labele sai vítima tan.
Notísia Relevante: SERVE, I.P rejista ajénsia viajen hamutuk 170
“Horikalan ha’u simu informasaun ita-nia ajénsia ka individu balun apoiu timoroan atu lori ba servisu iha nasaun Malázia no Alemaña iha tempu badak, Governu hatene iha akordu baze legál entre nasaun rua, ami deputadu sira presiza hatene. Nune’e, bainhira povu husu bele esplika ba sira, labele halo ita-nia ema sira sai terus iha ema-nia rain. Tanba realidade iha fulan hirak liu ba, ita-nia ema sira sai vítima iha Portugá. Dehan sira ba servisu maibé servisu no hela fatin iha ne’ebé, loron-kalan mak sira ba toba iha estrada ninin no Jardin. Governu tenke tau atensaun ba asuntu ida-ne’e,” Deputada hosi Bankada Fretilin, Maria Ana Bela Savio, hato’o liuhosi reuniaun plenária iha sala plenária Parlamentu Nasionál, segunda ne’e.
Nia hatutan, Governu tenke tau atensaun no Governu tenke hatene se bainhira iha dalan klaran mak haosru problema tenke husu ba sé, nune’e ema presiza hatene ida-ne’e.
“Apresia ba inisitiva di’ak hosi ajénsia hodi ajuda timoroan sira ba servisu iha rai-li’ur maibé nu’udar reprezentante povu hato’o ba Governu atu tau atensaun, nune’e lakohi ita-nia ema sira to’o iha dalan klaran sai terus tan,” nia hateten.
Ho ida-ne’e, sidadaun timoroan presiza buka hatene informasaun ho didi’ak atu ba servisu iha rai-li’ur, karik liuhosi ajénsia sira-ne’ebé hetan legalidade hosi Governu no servisu hamutuk ho SEFOPE nune’e ikus labele mosu problema.
Deputada CNRT, Virgina Ana Belo, hateten ho informasaun liga ba traballadór timoroan sira, hanesan iha 29 setembru agora, iha traballadór timoroan lubun ida atu sai ba Polandia ne’e suporta hosi partidu polítiku balun maibé nia parte lahatene iha koordenasaun ho Governu ka lae tanba to’o ikus iha problema Governu mós tenke toma responsabilidade.
“Se ita lori ita-nia maluk sira hakarak buka servisu ba iha nasaun sira-ne’e tenke iha kondisaun ona, labele ba hosik hela sira toba lemo-lemo laiha fatin ba deskansa no servisu. Se iha ona akordu klaru, iha ona ema ruma ba haree situasaun, ida-ne’e tenke tau konsiderasaun,” nia dehan.
Notísia Relevante: Lei sosiedade komersiál bandu ajénsia viajen rekruta ema serbisu iha rai-li’ur
Jornalista : Nelson de Sousa
Editór : Cancio Ximenes
