DILI, 20 jullu 2022 (TATOLI)—Diretór Ezekutivu Servisu Verifikasaun Emprezariál, Institutu Públiku (SERVE.I.P), Florêncio da Costa Sanches, hateten, daudaun ne’e, ajénsia viajen ne’ebé eziste hamutuk 170.
“Ita rejista ajénsia viajen pakote hamutuk ho turizmu iha 170 mak hala’o hela atividade iha territóriu laran. Ajénsia viajen sira-nia ezisténsia ne’e di’ak tanba liuhosi sira ne’e mak Governu promove atu loke odamatan ba setór privadu bele investe iha rai-laran,” Diretór hateten ba Agência Tatoli, iha ninia knaar fatin, Hudi-laran, kuarta ne’e.
Tuir Diretór, ajénsia viajen só bele hetan setifikadu hosi SERVE, I.P atu loke ajénsia viajen fa’an billete ba ema halo viajen ba rai-li’ur, maibé labele halo fali atividade rektrutamentu.
Aleinde ne’e, kona-ba ajénsia rekrutamentu, ninia ezisténsia atu halo rekrutamentu ba ema serbisu, maibé tenke iha ona sentru formasaun ne’ebé hetan ona lisensa setorál hosi Institutu Nasionál Mão de Obra (INDIMO).
“Ita-nia lei permite atu kompañia ida bele foti hotu ajénsia viajen no ajénsia rekrutamentu, maibé atu hetan rua ne’e hotu, SERVE, I.P serbisu hamutuk ho INDIMO bainhira iha pedidu ruma tama katak iha entidade ruma hakarak loke ajénsia rektrutamentu, ami bele fó bainhira INDIMO hateten bele ona,” nia akresenta.
Notísia relevante: SERVE, I.P halo verifikasaun ba ajénsia viajen halo rekrutamentu ilegál
Nia klarifika, kompañia ida iha direitu foti hotu ajénsia rua ne’e dala-ida, bainhira hetan ona sertifikadu ajénsia viajen no rektrutamentu, maibé hetan de’it sertifikadu ida mak labele uza ajénsia ida ba taka fali ajénsia ida.
“Ita konsege halo verifikasaun ba ajésnia sira no konsege hetan ajénsia liu tolu mak viola regra. Ajénsia ne’ebé ita deteta sira dehan ajénsia rekrutamentu, maibé hafoin ita halo verifikasaun katak sira la eziste no balun ne’e eziste maibé la’os ba ajénsia rektrutamentu,” nia haktuir.
SERVE, I.P deteta bainhira halo verifikasaun ba fíziku no arkivu elektróniku, ne’ebé hatudu entidade sira ne’e viola lei númeru 10/2017 kona-ba sosiedade komunikasaun, dekretu lei númeru 16/2017 kona-ba rejistu komeriál no dekretu lei 34/2017 kona-ba lisensiamentu atividade ekonómiku.
Sansaun ba ajénsia sira ne’ebé kontra regra ba fallansu rejista, hetan penalidade hamutuk $5.000, maibé deteta ninia atividade ne’e hala’o ona antes penalidade ne’e, sura loron ne’ebé hahú entaun bele penalidade loron ida $5 sura bele to’o $100.000 depende ba durasaun.
“Ajénsia sira ne’e ha’u labele temi nia naran, maibé ne’e ajénsia nasionál hotu. Ha’u husu ba joven sira ne’ebé hakbesik ba ajénsia sira karik tenke mai SERVE atu konfirma, nune’e ita bele hatene atividade ba ajénsia ne’e loos ka lae, nune’e imi labele sai vítima,” nia fó hanoin.
Jornalista : Arminda Fonseca
Editora : Julia Chatarina
