iklan

DILI, POLÍTIKA, SEGURANSA

Membru PNTL tenke hamutuk ho komunidade asegura seguransa iha bairru

Membru PNTL tenke hamutuk ho komunidade asegura seguransa iha bairru

Segundu Vise-Prezidente Parlamentu Nasional, Luis Roberto, Deputadu Bankada KHUNTO

DILI, 26 setembru 2022 (TATOLI)—Segundu Vise Prezidente Parlamentu Nasionál, Luis Roberto, husu membru Polísia Nasionál Timor-Leste (PNTL) sira-ne’ebé hela iha kada bairru iha Dili ne’e tenke hamutuk ho komunidade hodi asegura seguransa.

“Husu ba komandu jerál hodi fó hanoin nafatin ba iha membru PNTL hotu-hotu hodi bele hela iha bairru ne’ebé de’it tenke asegura seguransa ne’e ba komunidade hotu, labele hamutuk fila-fali ho grupu ida hodi tuda fila-fali grupu seluk. Satán ita uza tan farda polísia nian mak hodi fatuk tuda populasaun nia uma, ida ne’e imajen ladi’ak ba pesoál PNTL sira,” Deputadu Luis hateten liuhosi reuniaun plenária iha Parlamentu Nasionál, segunda ne’e.

Deputadu hosi membru komisaun B trata asuntu Negósiu Estranjeiru no Defeza ho Seguransa ne’e, hato’o kestaun ne’e ligadu ho foin lalais deskonfia iha pesoál menbru PNTL ida hamutuk ho grupu balun tuda fatuk ba komunidade balun iha bairru balun iha Dili nia uma ne’ebé hetan estragu.

“Iha semana kotuk ha’u halo vizita ida ba iha Manumeta Raihun iha aldeia Mate Restu nian no mós ba iha Ailok Laran, aldeia Ruin Naklekar, iha ne’eba iha 17 setembru ne’e, akontese iha ne’eba tuda malu to’o rezulta ita-nia komunidade iha aldeia Mate Restu ninian nia uma kala ko’ak hotu tanba kalen sira tuda kuak hotu,” nia dehan

Nia informa, autór ida-ne’ebé hamriik iha ulun hodi tuda komunidade nia uma ne’e deskonfia pesoál membru PNTL ida mak hamriik iha oin hodi tuda populasaun nia uma.

“Tanba ne’e ita-nia populasaun kestiona estabilidade seguransa internál ne’ebé bele komunidade dehan lakon konfiansa ba ita-nia PNTL sira, bainhira pesoál PNTL ida-nia hahalok,” nia hateten.

Tanba ne’e, nia dehan, komunidade ho autoridade lokál sira iha fatin ne’eba agora prepara hela atu hatama keixa ba komandu PNTL.

Jornalista : Nelson de Sousa

Editór       : Cancio Ximenes

iklan
iklan

One Comment

  1. Tenke halo investigasaun. Se membru PNTL ne’e envolve iha asaun krime sira hanesan ne’e no karik iha prova katak nia envolve iha grupu ruma, di’ak liu hasai tanba, nu’udar membru PNTL atu asegura komunidade ho imparsialidade no tanba saláriu ne’ebé fulafulan nia simu ne’e Estadu nian la’ós grupu nian.

Leave a Reply

iklan
error: Content is protected !!